Projekt k wobchowanju awdiowizuelneho herbstwa nimale skónčeny

Budyšin/Drježdźany (SN/CoR). Dźesać zwjetša hišće njewozjewjenych serbskich filmow z lěta 1947 do 1993 budźe bórze zjawnosći spřistupnjenych. Loni zahajeny a wot sakskeho ministerstwa za wědomosć a wuměłstwo spěchowany modelowy projekt Filmoweho zwjazka Sakskeje ze Załožbu za serbski lud, Serbskim institutom, załožbu DEFA, Zwjazkowym archiwom a Sakskej krajnej a uniwersitnej biblioteku (SLUB) je nimale skónčeny.

Serbske filmy su tuž prěni wuslědk předewzaća sakskeho knježerstwa z lěta 2014, wohrožene awdiowizuelne herbstwo w kraju přez digitalizaciju wobchować a je zjawnosći znowa spřistupnić. Na to su w lětomaj 2015 a 2016 w SMWK a w sakskim filmowym zwjazku dźěłowej městnje zarjadowali. Z pomocu wulkeho naprašowanja po cyłym kraju zwěsćichu filmowy material we wobjimje dohro­mady 2,9 milionow mjeńšin w najwše­lakorišich institucijach.