Swójba steji w srjedźišću angažementa a myslenja dr. Uty Strewe, kotraž so lětsa za socialnych demokratow w Budyskim wokrjesu 156 wo městno w nowym zwjazkowym sejmje požada. Sama ma katolska wudata žona štyri dźěći w starobje dźewjeć do 19 lět. Ze Šwabskeje je wona 1993 najprjedy do Drježdźan ćahnyła, hdźež wukubłana wučerka w stawiznach promowowaše, a před jědnaće lětami je so swójba w Porchowje zadomiła. Po dźěławosći jako wučerka a wukubłarka referendarow skutkuje dźensa 46lětna mjeztym samostatnje jako pomocnica w sudniskich jednanjach (Verfahrensbeistand). Wona zastupuje w swójbnych jednanjach zajim dźěći, hdyž chcetaj so staršej na přikład rozeńć. Wjace hač 1 500 dźěći je w běhu lět mjeztym doma wopytała, so ze staršimaj, dźědom a wowku rozmołwjała a tak hłubši dohlad do dźensnišeho połoženja swójbow a jich problemow w Budyskim wokrjesu dóstała. Tele nazhonjenja su Utu Strewe tež k tomu pohnuli, so politisce angažować a lětsa za zwjazkowe wólby kandidować.