W Hornjej Łužicy kaž w Sakskej Alternatiwa za Němsku najsylniša strona
Budyšin (SN/at). Alternatiwa za Němsku je (AfD) je wčerawše wólby do Němskeho zwjazkoweho sejma w Hornjej Łužicy kaž tež w Sakskej před CDU a Lěwicu dobyła. W tudyšimaj wólbnymaj wokrjesomaj naslědujetaj kandidataj AfD, policist Karsten Hilse a molerski mišter Tino Chrupalla, Marju Michałkowu a Michaela Kretschmera (wobaj CDU) do direktneho mandata. Kretschmer samo dale w parlamenće njebudźe. „Wězo kontakt z Domowinu nawjazam, wšako sym jako direktny kandidat zastupjer wšěch wobydlerjow we wólbnym wokrjesu“, rjekny Karsten Hilse na wólbnym wječoru Serbskim Nowinam.
„Wuslědk takle njejsym wočakował. Budźe wužadanje, dokelž wjelelětni partnerojo kaž Michael Kretschmer wjace w sejmje zastupjeni njejsu. Nastupajo AfD pak zwěsćamy, zo bě wona jenička strona, kotraž je na wólbne kopolaki Domowiny negatiwnje wotmołwiła. To wubudźi wězo prašenje, kak Domowina z njej přichodnje wobchadźa“, rozłožuje předsyda Domowiny Dawid Statnik wuslědki w Hornjej Łužicy.