Skating a reje
Njebjelčicy. Młodźinski klub Njebjelčicy wuhotuje jutře, 14. awgusta, w 16 hodź. inlineskating. Start kaž tež cil budźetej při wjesnym sportnišću. Poskitk měri so předewšěm na starobnu skupinu wot dwanaće do 30 lět, škitny nahłownik je předpisany. Połne koło wjedźe mjez druhim do Serbskich Pazlic, Worklec a Kukowa. Na wobdźělnikow wot 16 lět čaka po tym H.L.B.-party – skrótšenka steji za „Hasta La Beach“ – z DJjowej dwójku JJ direktnje při klubje na Hłownej dróze. Zastup tam płaći tři eura.
Japanski organist hudźi
Budyšin. Izumi Ikeda je organist, kiž drje změje najdlěši puć na Budyske pišćelowe lěćo za sobu, hdyž so srjedu, 18. awgusta, w 19.30 hodź. do tastow Euloweho instrumenta w tachantskej cyrkwi da. Wšako bydli a skutkuje wón w japanskim měsće Fukuoka. W Budyšinje chce připosłucharjam twórby Maxa Regera a Friedricha Liszta předstajić. Zastup je kaž kóždu srjedu darmotny, pišćelowe lěćo zarjadowacy Cyrkwinskohudźbny skutk Budyšin pak wjeseli so nad wulkomyslnymi darami.
Lětuša 48hodźinska akcija
