Wodźenje a woptawanje
Pančicy-Kukow. Pod hesłom „Klóšter, zela a karpowy filej“ zarjaduje iniciatiwa Slow Food Łužica jutře, sobotu, w 11 hodź. informaciske wodźenje po zahrodźe klóštra Marijineje hwězdy. Po tym chce gurmejowa kucharka Kerstin Mickan wopytowarjow z lokalnymi kulinariskimi chłóšćenkami zawjeselić. Nimo toho sposrědkuje předsyda krajneho zwjazka rybarjow Sakskeje Andreas Stummer zajimawostki kołowokoło regionalneho, naslědneho hatarstwa. Zajimcy njech přizjewja so pod . Zastup, jědź a napoje płaća dohromady 25 eurow.
Komedija za wosebitu płaćiznu
Budyšin. „Hrabnjenčko“ mjenuje Budyske Němsko-Serbske ludowe dźiwadło akcije, z kotrymiž móža sej zajimcy zastupne lisćiki za jenož wosom eurow kupić. Zajutřišim, njedźelu, 19. septembra, budźe zaso tak daloko. W 17 hodź. pokazaja na hłownym jewišću komediju „Dołhož fenki běža“ ze simultanym přełožkom do němčiny. Awtor hry je Michael Cooney, zeserbšćiła je ju Měrana Cušcyna. Nimale wšitcy serbscy dźiwadźelnicy domu su w inscenaciji widźeć.
Awtor Roman Israel čita
