Rěčny projekt „Zorja“ so z prěnim kursom njedawno w Dešnje zahajił

Hnězda maja w delnjołužiskej baćonjacej wsy Dešnje mnohe, na Depšćanskej dróze 26 pak jedne wosebite. Za fasadu z čerwjenych cyhelow bydlenskeho domu štyristronskeho statoka chowa so „rěčne hnězdo“. Tak mjenuja wobdźělnicy a zamołwići projekta „Zorja“ swój domicil. Tak kaž baćony swoje młodźata w hnězdźe na žiwjenje přihotuja, chcedźa rěčni trenarjo swojich Zorjanow tam w delnjoserbskej rěči wukmanjeć.

Wotwonka rěčne hnězdo jako kubłarnju njespóznawaš. Zastupiwši do statoka napadnu ći walčki słomy na sćěnje přejězda. Typisku šulsku atmosferu wone runje njewuprudźeja, skerje wjesnu. Něšto krokow dale sy w domskim. We wochěži wita plakat, kiž na projekt skedźbnja. Nalěwo je kuchnja, runjewon rumnosć, hdźež so kursisća z trenarjemi rěče k zhromadnemu wuknjenju zetkawaja. Mjez woběmaj leži „open ­space“. Mjeńša to rumnosć z pisanskim ­blidom a polcu. Rjad knihow, dary k zahajenju projekta, na njej hižo wuhladaš. Wjetša a mjeńša kawč, křesło a dwě blidce tworja přijomny kućik blisko ­wokna.