Dr. Monika Liznarjowa dlěje hač tři lětdźesatki pacientow we a wokoło Radworja zamołwiće zastarowała
Dlěje hač tři lětdźesatki bě dr. Monika Liznarjowa domjaca lěkarka w Radworju. Lětsa spočatk julija je so na zasłuženy wuměnk podała. A wězo bě so wo to prócowała, praksu a pacientow do zamołwiteju rukow přepodać.
Monika Liznarjowa, rodźena Klimanec, narodźi so 1959 w Radworju, hdźež je wotrostła. Wosrjedź wsy wobsedźeštaj staršej statok z pódlanskimi twarjenjemi. Bróžnja bu za čas NDR w 70tych lětach přetwarjena. Tehdy nastawachu ambulancy, a tak běštej hižo tehdy domjaca lěkarska praksa kaž tež zubnolěkarska praksa w bywšej bróžni zaměstnjenej. Nad praksomaj běchu tři mjeńše bydlenja za sobudźěłaćerjow w prodrustwje přihotowane.
