Do magiskeho raja swěcy wulećeć móžeće sebi tuchwilu w parku hroda Pillnitz. Wjacore tysacy swěcow wobswětleja tam magiski raj bajkojteje zymskeje krajiny. Na dwaj kilometraj dołhim kole po parku móžeće sebi najwšelakoriše zajimawe instalacije wobhladać. Hižo wot lěta 2018 zarjaduja w historiskim parku blisko Drježdźan tak mjenowany „Christmas garden“, potajkim „hodownu zahrodu“. Ta pak so po hodźoch hišće njezawrěje. Hač do 16. januara hišće maja zajimcy móžnosć zybolacy a frinkolacy swět soninow, galaksijow a bajkojtych postawow na cyle swójske wašnje dožiwić.

Hižo wot lěta 2018 zarjaduje zawod Christmas garden GmbH pisany spektakl w Sakskej. Na dalšich dwaceći městnach po cyłym swěće maja podobne zarjadowanja. Mjez druhim tež w Londonje. We wobłuku wobrazoweho wubědźowanja móža sebi zbožowni tež tam dojěć. Za to dyrbiće swoje foto, kotryž sće w Pillnitzu sčinili, cyle jednorje pod hashtagom #ilovechristmasgarden na Instagramje wozjewić. Mjez wobdźělnikami wulosuja jako hłowne myto štyri­dnjowsku jězbu do Londona.