Hdyž nimale tři měsacy po Jakubowym puću putnikuješ, trjebaš „krutu wolu, zbytk so poda“, měni putnik Guido Budar

Guido Budar (39) z Noweje Wjeski je so loni w lěću na putnikowanje podał. Njebě dwej njedźeli po puću, tež nic měsac, ale dohromady je nimale tři měsacy po Jakubowym puću putnikował – wot ródneje wsy wosrjedź Łužicy hač do Santiaga de Compostela a hišće tróšku dale. Pětr Šołta je so ze serbskim putnikom rozmołwjał.

Guido, dopominaš so hišće na wokomik abo wobstejnosće, jako sy so rozsudźił, zo do Santiaga poběžiš?

Před něhdźe 20 lětami smy so w młodźinje z tematiku putnikowanja zaběrali. Tehdy smy tež wot Gerata Róbla tójšto zhonili, kotryž bě do Roma putnikował. A w tutym nastupanju zhonich tohorunja wo třoch wulkich putniskich čarach: do Roma, Jerusalema a Santiaga de Compostela. Puć do Roma zdaše so mi tehdy kusk překrótki a do Jerusalema zaso jara daloki. Tak zwosta město w Španiskej, do kotrehož wot nas něhdźe tři měsacy běžiš, štož so mi njemóžne njezdawaše.

Što bě přičina za to, zo sy so na tute putnikowanje podał?