Pawoł Nowak z Wulkeje Nydeje je rejowar a rejowanski sudnik a lubuje swój sport
Wulke wjeselo mjez přihladowarjemi je rejowanski turněr we Weißenfelsu zbudźił. Sta ludźi běše do měšćanskeje hale přišło. „Ze swojej rejowanskej partnerku a naju přećelemi z Altenburga, Wojerec a Lipska běch mjez nimi“, zhladuje 24lětny Pawoł Nowak z Wulkeje Nydeje na hnujacy podawk. Hromadźe z Joelinu Ermold (20) z Altenburga je wón loni w septembrje krajne mišterstwo Saksko-Anhaltskeje a Durinskeje we hłownej skupinje A, standardne reje, dobył. Z titulom krajneho mištra je młody rejowanski por do klasy S rejwanskeho sporta w zwjazkowej republice postupił.
