Kajke su žiwjenske wobstejnosće woprawdźe na južnym boku swěta? A kajke maja tam zastaranje za dźěći? Tute a podobne prašenja měješe Borbora Šeferowa, jako poda so do Južneje Afriki.

Połna wjesela podach so loni spočatk oktobra ze swojim mužom do Južneje Afriki. Poskitk běchmoj sej přez pućowanske posrědnistwo sonnenklar.TV wupytałoj, pola kotrehož hižo lěta dołho knihujemoj. Južna Afrika běše namaj woběmaj dospołnje njeznaty kraj, kotryž chcychmoj zeznać. Pola pućowanskeho poskićowarja běchu dnjowe wulěty jara nazornje wopisane a předstajene, štož je so namaj wosebje lubiło.

Tež němski přewod jězby běše nam wažny, wšako njejsu naju znajomosće jendźelšćiny wosebje dobre. Nimo přijomnych ćoplišich temperaturow, za kotrymiž so žedźachmoj, běchmoj wćipnaj na krajinu, na ludźi a na nam njeznatu, nowu kulturu.