Bratraj-dwójnikaj Anton a Richard Fuchs staj wusko z Krabatowym młynom w Čornym Chołmcu zwjazanaj. Přiwšěm pak kročitaj dwójnikaj po wšelakich powołanskich pućach. Milenka Rječcyna je so z nimaj rozmołwjała.
W našej wokolinje znaja ludźo Waju předewšěm Waju angažementa za Krabatowy młyn dla. Hdźe pak mataj swoje korjenje nastupajo wuměłske skutkowanje?
Anton: Pochadźamoj z Łutow. Tam smój do zakładneje šule Hans Coppi chodźiłoj, po tym pak na Wojerowski Lessingowy gymnazij. Mjeztym zaso wjele we Łutach přebywamoj, wosebje ja, wšako w Čornym Chołmcu dźěłam.
Što je Waju runje na mjenowany gymnazij wabiło?
Anton: Smój na zakładnej šuli hižo dźiwadło hrałoj. Ze skupinu běchmoj mjez druhim na zetkanju młodych dźiwadźelnikow w Złokomorowskim dźiwadle. To je naju zahoriło. Naju sotra je swój čas na Lessingowym gymnaziju w hudźbnej rjadowni wuknyła a w chórje spěwała. Wona sposrědkowa namaj začuće, zo knježi na tymle gymnaziju dobra zhromadnosć. Tuž běše namaj spěšnje jasne, zo tam póńdźemoj. Naju dalša wulka sotra je na Foucaultowym gymnaziju wuknyła.
