Pětr Wencl je jako busowy šofer serbske mustwo na Europeadźe wozył. Tomu bě hižo druhi raz tak.
Poprawom je Pětr Wencl wukubłany blidar. Cyłkownje 25 lět je wón powołanje wukonjał a we wšelakich rjemjeslniskich předewzaćach dźěłał. „Dźensa pak je wjele móžnosćow druhe powołanja wukonjeć a tuž sym móžnosće wužił“, 50lětny zwurazni. W lěće 2019 je w Radworskim Šmitec wozydłownistwje dźěłać započał a wuspěšnje jězbnu dowolnosć za busoweho šofera złožił. Z toho časa je předewšěm na linijach w Budyskim wokrjesu zasadźeny. Hdys a hdys pak přewza tež dlěše jězby. Měrkowčan w swojim wólnym času rady kolesuje a tuž njezadźiwa, zo mjez druhim jězby kolesowarjow Šmitec wozydłownistwa přewodźa. Tohorunja znaje wjele serbskich sobujěducych Pětra Wencla z wšelakich jězbow. Tak wozy na přikład hižo serbskich wěriwych do Oberammergauwa.
