Hižo štyri stacije su zašłe. Hraješe so w Ralbicach, Jaseńcy, Róženče a w Kulowje. Nowo­stka běše lětsa Jasčanska stacija, dokelž tam dołho hižo njehrajachu a dwanatki Serbskeho gymnazija ju wuhotowachu. Tuž přichwata něhdźe 300 přihladowarjow, zo bychu sej spektakl wobhladali. Tak so pohonjowachu a bjesadowachu. Naš młodźinski redaktor Julius Paška je so ze zamołwitej dwanatkarjow Celinu Knopec, kotraž měješe wotežce w rukomaj, rozmołwjał. Na prašenje čeho­dla su so za beachturu požadali, wotmołwi, zo trjebachu pjenjezy za maturowu kasu, z kotrejž dyrbja cyłe ewenty a swjedźenje sami zapłaćić. Chcychu pak tež zaso serbsku młodźinu zhromadźić a tak z druhimi młodostnymi bjesadować. Požadanje běše spěšnje wotpósłane. Su e-mejlku na młodźinsku redakciju pisali a so na přiwzaće nadźijeli. Z wuspěchom. Wobrubichu druhu staciju z wurjadnym wukóncom. Próstwu wo wobdźělenje wupósłachu před měsacom a krótko po tym dóstachu zelenu swěcu. Potom započachu zarjadowanje organizować.