Wopominaja Huga Dietricha
Wojerecy. „Rowjenkojo, hudźbni kolegojo a přećeljo“ wopominaja jutře, sobotu, Inga Huga Dietricha. „Wobdarjeny gitarist a hudźbnik, wjelelětny čłon Brigady Feuerstein a wulkotny čłowjek“ bě kónc junija zemrěł. We Wojerowskej kulturnej fabrice zaklinča pod hesłom „überLEBEN“ w 19 hodź. spěwy, kotrež bě mjez druhim ze swojej partnerku Carmen, Gerhardom Gundermannom abo tež solistisce prawidłownje na jewišćach předstajił. Zastup je darmotny, pjenježny dary pak so njewotpokazuja.
Eksotiski srjedźowěk
Wuskidź. Wólnočasowy park we Wuskidźi je jutře, sobotu, a slědowacu njedźelu z hosćićelom „Swjedźenja srjedźowěka a eksotiki“. Stajnje wot 10 do 18 hodź. móža wopytowarjo tradicionalnym rjemjeslnikam přez ramjo hladać, z tesakami a hlebijemi wojowacym ryćerjam a jěcharjam přihladować abo „Show zmijow“ wobdźiwać. Nimo toho čakatej wustajeńca „Zwischen Hammer und Federkiel – ein deutsch-polnischer Perspektivwechsel“ a přehladka papagajow na zajimcow. Zastup je darmotny, pjenježne dary pak so njewotpokazuja.
