650 lět Wětrow, wot 1898 ze znatej šamotownju – wot 1951 nasta nowe sydlišćo za dźěławych zawoda

Wětrow wosrjedź Budyskeho wokrjesa, něhdźe štyrnaće kilometrow sewjerozapadnje wulkeho wokrjesneho města Budyšina a tři kilometry wot Njeswačidła. Susodna wjes su Bóšicy, kotraž je hamtske sydło dwurěčneje gmejny. Do njeje słuša dźewjeć wsow. Wětrow bu w lěće 1936 do Bóšic zagmejnowany a wobsteji hižo dlěje hač 70 lět z dweju dźělow. Bywša burska wjes bu před 650 lětami prěni raz pisomnje naspomnjena a jej rěkaja ludźo nětko Stary Wětrow. Z lěsom wobdata hórka sewjernje stareje wsy dźěli ju wot sydlišća Wětrowa, kotrehož prěnje twarjenja nastachu w lěće 1951 za dźěławych Wětrowskeho zawoda za wohnjokrute maćizny. Na ležownosći natwarichu 1898 prěnju mjeńšu šamotownju. Stary Wětrow rozpřestrěwa so južnje naspomnjeneje hórki a leži we wysokosći 180 do 195 metrow nad mórskej hładźinu a ma dalšich dwaceći statokow.

Wulka deponija za wosebite wotpadki