Druhi raz mjeztym organizowaše Chróšćanski młodźinski klub lětsa kónc tydźenja partyjow. Pjatk běchu wšitcy hejsowarjo nad 30 lětami na mjeztym legendarnu Ü30-party přeprošeni. Sobotu běše wjace­zaměrowa hala „Jednota“ napjelnjena z mnohimi wopytowarjemi, hudźbu a dobrej naladu. Hač do běłeho ranja rejowachu młodostni a ći, kotřiž so młodźi čuja. Tež tónraz su organizatorki

a organizatorojo z wothłosom jara spokojom byli.

Nazyma je čas kermušow. Kermušne reje běchu a su jich kruty wobstatk. W Pančicach-Kukowje a Chrósćicach lětsa tajke reje zaso mějachu. Do depota dobrowólneje

wohnjoweje wobory w Kukowje přichwata syła ludźi, zo by so při rejce a piwku na posledni wotrězk lěta hotowała. Něhdźe 250 ludźi tam zličichu. Tydźeń pozdźišo běchu tež w Chrósćicach reje w Hórnikowym domje, kotrež bě młodźinski kružk wosady organizował. Live-hudźba skupiny Serbeat drje bě najrjeńše dožiwjenje. Tež tu mějachu wjace hač 200 wopyto­warjow.