We Warnoćicach wučbnu šćežku wo slědach Serbow wotewrěli
Warnoćicy (SN/VaŽ). Wučbna šćežka „Na serbskich slědach po Warnoćicach“ bu minjeny pjatk swjatočnje zahajena. Šćežka dokumentuje stawizny Serbow we Warnoćicach po Druhej swětowej wójnje. Šulerki a šulerjo Budyskeho Serbskeho gymnazija a Biskopskeho gymnazija we Warnoćicach su dlěje hač lěto na tutym projekće dźěłali, kotryž staj dr. Jana Piňosová a dr. Robert Lorenc ze Serbskeho instituta w Budyšinje nawjedowałoj. Šćežka bu w zhromadnym dźěle ze Serbskim institutom kaž tež kooperaciskimi partnerami – Warnočanskim měšćanskim muzejom a měšćanskej biblioteku – wuwita. Projekt je Załožba za serbski lud spěchowała. Wučbna šćežka wobjima dźesać stacijow, kotrež so z awdijowymi přinoškami w serbšćinje, čěšćinje a němčinje wudospołnjeja. Wone na serbsku zhromadnosć we Warnoćicach dopominaja.
