Spěšnje roznjese so wutoru rano powěsć, zo je daloko znaty Konječan Jan Šołta w kruhu swójbnych w Drježdźanskej chorowni zemrěł. Wón bu 83 lět a bě čas ­žiwjenja z ratarstwom, pčołarstwom a serbskim spěwom zwjazany.

9. hodownika 1941 narodźi so Jan Šołta serbskej ratarskej swójbje w Salowje. Nan bě we wójnje padnył a tak je so njeboćički hižo za šulski čas z ratarskim dźěłom ze­znajomił. 16 hektarow wulke swójbne ­ratarstwo dźě měješe wobhospodarjene być. Po wopyće šulow w Koćinje a Kulowje da so wón we Wojerecach na ratarskej šuli wukubłać a dźěłaše w domjacym ratarstwje. Jako pak nuzowachu mać 1959 do prodrustwa, so Jan z ćežkej wutrobu ratarskeho dźěła wzda. Na to zasłužeše sej swój wšědny chlěb we Wojerowskej twarskej uniji, po překubłanju jako powołanski šofer. Po słužbje we wójsku dźěłaše wón w Salowskej cyhelnicy hač do jeje zawrjenja 1970. Přechodnje dźěše Jan ­Šołta do lěsnistwa a přińdźe po tym do Ralbičanskeje prodrustwoweje zamkarnje a pozdźišo do zamkarnje Ralbičanskeje kormjernje swini.