Moskwa (dpa/SN). Ruska sej wot Wulkeje Britaniskeje žada, zo so za ćežke wumjetowanja w padźe zajědojćeneho něhdyšeho agenta Sergeja Skripala zamołwi. To zdźěli rěčnik Krjemla Dmitrij Pjeskow powěsćerni Interfax.

Wulka Britaniska ma Rusku za hłowneho zamołwiteho za atentat, při kotrymž bu něhdyši dwójny agent ze sowjetskim jědom Nowičok zajědojćeny. Britiski labor je jědojtu ma­ćiznu přepytował. Kaž wčera wottam rěkaše, njeje pak dokładnych pokiwow na to, zo jěd woprawdźe z Ruskeje pochadźa. Bri­tiska bě wjacorych ruskich diplomatow z kraja wupokazała. Pokazujo swoju solidaritu z Londonom běchu mnohe europske kraje, mjez nimi tež Němska, to samsne či­nili. Ruska reagowaše nawopak runje tak.

Ankara (dpa/SN). Najebać rozdźělne pozicije w Syriskej su so turkowski prezident Recep Tayyip Erdoğan, ruski prezident Wladimir Putin a iranski prezident Hassan Ruhani dźensa w Ankarje zetkali, zo bychu wo móžnych naprawach na dobro ciwilneje ludnosće w Syriskej wuradźowali. Při tym dźe mjez druhim wo tak mjenowane deeskalaciske cony. Ruska a Iran podpěrujetej syriskeho mócnarja Bashara al-Assada, Turkowska porno tomu wojowarjow opozicije.

Hladajo na zetkanje w Ankarje žada sej statny minister we wonkownym minis­terstwje Niels Annen (SPD) sylniše zasadźenje Němskeje za kónc wójny.

Podstupim (dpa/SN). Nimale žana chorownja hižo bjez lěkarjow z wukraja njewuńdźe. W Braniborskej je mjeztym kóždy sedmy z wukraja, w Choćebuskim Carla Thiemowym klinikumje je to nimale třećina 370 lěkarjow. „Wot wysoko motiwowanych, jara derje wukubłanych medicinarjow naš dom a pacienća enormnje profituja“, zdźěli jednaćel klinikuma Götz Brodermann.

Po informacijach braniborskeje lěkarskeje komory je ličba wukrajnych lěkarjow znowa rozrostła, a to wo něhdźe 150 na nětko cyłkownje 1 364. Najwjac z nich pochadźa z Pólskeje, slěduje Sy­riska. Mjez nimi su tohorunja bywši ćěkancy. Dale přichadźeja medicinarjo z Ruskeje, Rumunskeje a Grjekskeje.

„Bjez lěkarjow z wukraja njeby wjele chorownjow runje na wsy we wjele wobłukach dźěłać móhło“, je Brodermann přeswědčeny. Zo bychu tež přichodnje dosć fachowcow měli, su w Carla Thiemowym klinikumje integraciski program zahajili, hdźež tuchwilu 16 medicinarjow swój praktikum wukonja.

Z knihu zhladuje Zhorjelski wokrjes na dźesaćlětne wobstaće

Zhorjelc (AK/SN). Wokrjes Zhorjelc wobsteji mjeztym dźesać lět. K tej składnosći wěnuje so hwězdna kolesowarska jězba k wšelakorym městnosćam. Cil ma 5. meje Rózbork nad Nysu być. Jubilej ­je tež tema wobydlerskeho swjedźenja 25. awgusta na dworje Zhorjelskeho krajnoradneho zarjada. Tón měsac ma tohorunja jubilejna kniha wuńć. „Dźěłowy titul je ,10 lět wokrjes Zhorjelc – Epizody mjez Mužakowom a Žitawu.‘ 150 stron wopřijaca wjazana kniha ma w nakładźe 2 000 eksemplarow wuńć“, zdźěli historikar Lars-Arne Dannenberg minjeny štwórtk, jako je prěnje wobsahi bliže předstajił. „Chcemy cyłkownu wjelorakosć Zhorjelskeho wokrjesa pokazać“, wón wuzběhny. Wobłuki sahaja wot dźěła přez sport, wólny čas hač ke kubłanju a wukubłanju. Zdobom poćahuja so awtorojo na hospodarstwo wokrjesa, hdźež njepokazaja jenož wulke zawody kaž Siemens a Bombardier. W regionje maja tež wjele mjeńšich předewzaćow.