To a tamne (20.03.18)
Wosrjedź powołanskeho wobchada dźěćo porodźiła je žona w šwicarskim Zürichu. Nowy čłowječk chcyše na kóždy pad na swět, jako nan hišće spyta so přez blachowu lawinu do chorownje předrěć. Skónčnje wón wosrjedź wjacečaroweje dróhi zasta, štož je skedźbnosć policistki zbudźiło. Wona móžeše dźěćko runje hišće popadnyć, kotrež bě žona na pódlanskim sedle porodźiła. Policistka sleče so pulower, zawi holčku do njeho a wołaše wuchowansku słužbu.
Nócnej harje wosebiteho razu njemóžeše tež policija w Badensko-Württembergskej wotpomhać: 66lětna žona wołaše zastojnikow, dokelž bě jej „wjacore nocy dołho trajacy monotony zwuk“ spar rubił. Zastojnicy do Denzlingena přijědźechu a zwěsćichu, zo bydli na štomje w susodstwje wulka sowa. A jej je nócny měr ludźi smorže. Žona dyrbi haru tuž dale znjesć.
Za njeboh kardinala so modlić
Mainz (B/SN). Biskop Mainzskeje diecezy Peter Kohlgraf je wěriwych z listom namołwjał, modlić so za kardinala Karla Lehmana. Strowotniski staw 81lětneho kardinala bě „kritiski“. Wot septembra 2017 je wón ze sćěhami infarkta a z kreju w mozach wojował. Jeho mocy so pospochi pozhubjachu, pisa Kohlgraf. Njedźelu, 11. měrca, je kardinal Lehmann na prawdu Božu wotešoł.
Namjet za Nobelowe myto
Soest (B/SN). Mjezynarodny komitej swětoweho modlenja žonow je namjetowany za měrowe Nobelowe myto. Ewangelska žónska pomoc we Westfalskej je 44 000 podpismow za nominaciju zběrała. Dalše informacije dotal njepředleža. Zaměr kampanje bě, zdobyć z njej podpěraćelow za natwar slědźerskeho instituta, kotryž so za měr na swěće zasadźa.
Přećiwo hidźe na Židow
Trump: Smjerć dealeram
Washington (dpa/SN). Prezident USA Donald Trump chcył wěstych wikowarjow z drogami přichodnje ze smjerću chłostać. To je po informacijach wysokorjadnych zastojnikow knježerstwa dźěl plana za bój přećiwo drogam w kraju. Tak móhł sej justicny minister jako hłowny wobskóržnik kraja w procesu přećiwo dealeram smjertne chłostanje žadać, „je-li to po płaćiwym zakonju přiměrjene“. W USA bě lěta 2016 na wšě 64 000 ludźi na sćěhi drogow zemrěło.
Fachowcy jěd přepytuja
London (dpa/SN). W konflikće mjez Wulkej Britaniskej a Ruskej atentata z jědom na něhdyšeho agenta Sergeja Skripala dla maja njewotwisni fachowcy zasadźeny jěd přepytować. K tomu wočakowachu dźensa zastupnikow Den-Haagskeje Organizacije za zakaz chemiskich bróni w Londonje. Maćiznu přepytować traje znajmjeńša dwaj tydźenjej. Ruski prezident Wladimir Putin je wobdźělenje Ruskeje na atentaće mjeztym wotpokazał. „Ruska tutón jěd scyła nima, dokelž smy wšitke chemiske brónje pod mjezynarodnym dohladom znješkódnili“, Putin w Moskwje potwjerdźi.
Rěča wo rozdźělenju pjenjez
Pod hesłom „Solidarni z Afrinom“ su wčera w Budyšinje bydlacy ...
Merkel Pólsku wopytała
Berlin/Waršawa (dpa/SN). Krótko po znowawuzwolenju poby zwjazkowa kanclerka Angela Merkel (CDU) na swojej druhej wukrajnej jězbje dźensa we Waršawje. W pólskej stolicy wočakowaštaj ju statny prezident Andrzej Duda a ministerski prezident Mateusz Morawiecki k rozmołwam. Najebać wšelake diferency chcetej wobaj krajej prawidłowne wuradźowanja z Francoskej we wobłuku „Weimarskeho třiróžka“ zaso wožiwić.
Na swojej prěnjej wukrajnej jězbje bě Merkel Francosku wopytała. Francoska a Pólska stej krajej, kotrejž němscy zwjazkowi kanclerojo tradicionelnje jako prěnjej wopytuja. Němsko-pólske poćahi su so widźomnje wochłódnili, po tym zo bě narodnokonserwatiwna strona Prawo a sprawnosć w Pólskej móc přewzała. Rozdźělneho měnjenja su w Berlinje a Waršawje w prašenju prawnostatnosće po justicnej reformje w Pólskej a w politice ćěkancam napřećo. Přiwšěm chcedźa styki dale wudźeržować.
Cłam zadźěwać
Putin wólby jasnje dobył
Moskwa (dpa/SN). Ruski statny šef Wladimir Putin je wčerawše prezidentske wólby ze 76,66 procentami dobył. To je wólbna komisija po wuličenju nimale wšitkich hłosow dźensa potwjerdźiła. Wólbne wobdźělenje wučinješe 67,47 procentow. Tak wostanje 65lětny Putin, kaž běchu powšitkownje wočakowali, dalše šěsć lět w zastojnstwje. Druhe městno wobsadźi komunist Pawel Grudinin z 11,8 procentami. Za nim slěduje prawicarski populist Wladimir Žirinowski, kiž nažnja 5,7 procentow hłosow. Za liberalnu telewizijnu žurnalistku Kseniju Sobčak hłosowaše 1,7 procentow. Štyrjo dalši kandidaća dóstachu hišće mjenje hłosow.
Opoziciji přichileni wólbni wobkedźbowarjo registrowachu něhdźe 3 000 pospytow manipulacije. Tak je dokumentowane, kak někotři wjacore wólbne lisćiki do wólbneho kašćika ćisnu. Z napjatosću wočakowachu tuž wuhódnoćenje wólbow přez Organizaciju za wěstotu a zhromadne dźěło w Europje, kotraž bě 600 wólbnych wobkedźbowarjow zasadźiła.
Mnozy maja hišće moped
Christian Krumm: Skónčnje „jězbna dowolnosć z 15“ po cyłej Němskej
Wojerecy (SN/mwe). Jedna z najwjetšich jězbnych šulow Hornjeje Łužicy słuša Wojerowskej wukubłanskej towaršnosći powołanskich šoferow (AGK). Jeje rěčnik Christian Krumm praji, zo chcedźa holcy a hólcy ze wsow wokoło Wojerec kaž tež z Kulowa a Łutow hižo z 15 lětami jězbnu dowolnosć za moped złožić.
To a tamne (19.03.18)
Na zubnolěkarskim terminje paducha zajał je policist w Bayerskej. Zastojnik ležeše w šwabskim Neu-Ulmje na lěkowanskim stólcu, jako so 34lětny paduch přez durje balkona do pódlanskeje rumnosće zadoby a tam ručnu tobołu chorobneje sotry pokradny. Jako policist podhladne zwuki zasłyša, skoči wón ze stólca a muža zaja. Kaž so wukopa, je paduch za cyłu seriju tajkich njeskutkow zamołwity. Wón sedźi mjeztym w jastwje.
6 000 eurow na nuzniku Duisburgskeho hłowneho dwórnišća je muž w móšni namakał a policiji přepodał. 23lětny sprawny namakar z Essena do toho hišće wobsedźerja pjenjez zazwoni, po tym zo bě w móšni jeho telefonowe čisło našoł. Zbožowny wobsedźer sej pjenjezy na policajskim rewěrje wotewza. Wón chcyše sej awto kupić a měješe tohodla telko pjenjez při sebi, kaž zastojnikam rozłoži.
Maas na wopyće w Pólskej
Berlin/Waršawa (dpa/SN). Wonkowny minister Heiko Maas (SPD) je so dźensa na nastupny wopyt do Pólskeje podał. We Waršawje wočakowachu jeho prezident Andrzej Duda, ministerski prezident Mateusz Morawiecki a wonkowny minister Jacek Czaputowicz. Do wotjězda potwjerdźi Maas trěbnosć wuskeho partnerstwa. „Bjez němsko-pólskeho přećelstwa njeje Europa předstajomna.“ Hižo srjedu bě Maas w Francoskej.
Bydleni prawicarjow přepytali
Drježdźany (dpa/SN). Sobudźěłaćerjo policajskeho ekstremizm a terorizm wotwobaraceho centruma su dźensa bydleni dweju bywšeju čłonow prawicarskoekstremneje skupiny „Swobodne kameradstwo Drježdźany“ přepytali. Mjez druhim sćazachu mobilne telefony, retl a zapiski, kaž krajny kriminalny zarjad zdźěla. Jednomu z prawicarjow wumjetuja, zo bě lěta 2015 wobdźěleny na nadpadźe neonacistiskeje skupiny „Freital“ na lěwicarski bydlenski projekt w Drježdźanach.
Přistajeni UNO stawkuja
