Moskwa (dpa/SN). Ruski wonkowny minister Sergej Lawrow ma rozprawy wo syriskim nadpadźe ze chemiskimi brónjemi w měsće Duma za zaměrnu prowokaciju. Ruscy wojerscy fachowcy su mjeztym w měsće byli, bjez toho zo bychu slědy chloroweho płuna našli, rjekny Lawrow w Moskwje. Wumjetowanja zapada, zo Ruska syriske zasadźenje jědojteho płuna přećiwo ciwilistam kryje, je we wočomaj Lawrowa dźěl antiruskeje kampanje, kaž powěsćernja Interfax zdźěla. Po informacijach aktiwistow je při pozdatnym zasadźenju jědojteho płuna w kónčinje Ghuta wjace hač 150 ludźi zahinyło. Tež němske knježerstwo w Berlinje na to tuka, zo je syriske knježerstwo za nadpad zamołwite.

Mjeztym je organizacija za zakaz chemiskich bróni přepytowanja zahajiła. Tak chcedźa rozprawy potrjechenych analyzować a na městnje informacije wo zasadźenych chemiskich maćiznach zběrać. Nimo toho prašeja so swědkow a bjeru pódu a druhe maćizny, zo móhli je w laborje na jěd přepytować.

Zwjazk městow a gmejnow kritizuje posudk sakskeho knježerstwa

Drježdźany (SN/MkWj). Sakske komuny su ­po słowach financneho ministra ­Mat­thiasa Haßa (CDU) pjenježnje derje wuhotowane. „Mamy fungowacy system“, rjekny Haß tele dny hladajo na financne wurunanje. Powšitkownje njeje trjeba system změnić, wón měnješe. Přiwšěm měł so dale wuwić, dokelž móže w jednotliwych padach přeco zaso k pro­blemam dóńć. Minister přizna, zo wobsteja diskrepancy mjez naladu w gmejnach a dobrym połoženjom swobodneho stata.

Komuny běchu sej w oktobru wjace pjenjez wot swobodneho stata žadali a swoje połoženje ze situaciju w zapadnych zwjazkowych krajach přirunali. Po tym docpěchu města a gmejny Sakskeje lěta 2016 runje 87 procentow přerěznych cyłoněmskich dochodow na wobydlerja. Byrnjež dochody stata přiběrali, připo­kazanki komunam stagněruja, tehdy rěkaše. Předewšěm małe komuny su wohrožene. Trěbne inwestije wobličichu na něhdźe 6,5 miliardow eurow.

Poprawom sej myslach, zo zaćehnje z nowym sakskim ministerskim prezidentom Michaelom Kretschmerom (CDU) čerstwy wětřik do sakskeje politiki. Prěnje signale premiera znajmjeńša běchu pozbudźace. Hdyž pak słyšiš wuprajenja noweho financneho ministra Matthiasa Haßa (CDU) nastupajo pjenježne połoženje komunow, maš zaćišć, zo pěstuje sakske knježerstwo poněčim zaso stil, kotryž zdaše so po ministerskim prezidenće Stanisławje Tilichu a toho financnym ministrje Georgu Unlandźe přewinjeny: W swobodnym staće je wšitko w porjadku. Nimamy žanu přičinu, něšto změnić! Runje to pak bě jedna z přičin, kotraž sakskich wolerjow loni w septembru pohnu přećiwo tomu pro­testować a swój křižik tam sadźić, hdźež widźachu pozdatnu alternatiwu. Swět sej rjany barbić nikomu ničo njepomha. Přichodne wólby su hižo klětu. Marko Wjeńka

Hinak hač někotryžkuli dorosćeny je so dźěćo w delnjosakskim Bergenje přikładnje zadźeržało: Po tym zo bě ze swojim kolesom njewotpohladnje do parkowaceho awta zrazyła a wóz wobškodźiła, dwanaćelětna holca poł hodźiny podarmo na wobsedźerja čakaše. Tež w bance, před kotrejž awto steješe, njewědźachu, komu wone słuša. Tuž dźěše na policajsku stražu, hdźež so wukopa, zo je limuzina słužbne awto měšćanosty. „To móhł sej tón abo tamny dorosćeny přikład wzać“, policija zadźerženje holcy chwaleše.

Chrobły paduch je dźěćom w Mecklenburgsko-předpomorskim Warenje myto pokradnył, kotrež měješe jim na kóncu detektiwneje hry kiwać. Slědujo wot star­šich wupołožene papjerjane šlebjerdki dóńdźechu dźěći skónčnje k jewišću pod hołym njebjom, hdźež měješe přizamknjene koleso stać. Tam pak ležeše jenož hišće skóncowany zamk.