Trawmu wutřěla dla je belgiski premierminister Charles Michel na sportowym wubědźowanju poćerpjeł. 41lětny politikar steješe pódla belgiskeje prin­cesny Astrid, sotry krala Philippe, jako je wona njedźelu rano z pistolu w ruce běh „20 kilometrow po Brüsselu“ startowała. Michel ma nětko wjacore lěkarske­ terminy. Na woblubowanym ludowym­ běhu je so 40 000 sportowcow wobdźěliło.

Wosrjedź nocy wohnjowu woboru wopytać chcyše dwulětny pjerach w hornjobayerskim Egmatingu. Z barikom a pólku w ruce wón wčera wokoło 2.30 hodź. po chódniku běžeše. Pěšk małeho nócneho pućowarja wuhlada a za­zwoni policiju. A tej móžeše hólčk dosć derje rjec, hdźe bydli. Nětko wšak přemysluje, hač by so tola radšo z policistom stał.

Manchester (dpa/SN). W zwisku z njedawnym bombowym nadpadom w Manchesteru je britiska policija dźensa 23lětneho muža zajała. Tak je so ličba zajatych podhladnych na 14 powjetšiła. Policija pruwuje, hač běchu zajeći atentatnikej při přihotach a přewjedźenju nadpada pomhali. Brita libyskeho pochada bě minjenu­ póndźelu po koncerće 22 wo­sobow do smjerće storhnył a wjace hač sto ludźi zrani. 54 z nich je přeco hišće w chorowni.

Znowa raketu wupruwowali

Pjöngjang/Seoul (dpa/SN). Najebać wjacore rezolucije UNO a mjezynarodne namołwy je Sewjerna Koreja znowa balistisku raketu wupruwowała. Raketa je dźensa rano na wuchodnym pobrjohu startowała a něhdźe 450 kilometrow do směra na Japansku lećała, generalny stab južnokorejskeje armeje zdźěla. Japanska je mjeztym raznje protestowała, bě dźě raketa do jeje pasma 200 milow před pobrjohom do morja zrazyła. Wjacore rezolucije UNO Sewjernej Koreji tajke testy zakazuja. Někotre typy raketow su kmane atomowe bomby transportować.

Bydlenja a běrowy přepytane