Regionalne powołanske wiki w Ralbicach běchu bjezdwěla wuběrnje organizowane. Zarjadowanje je dobra móžnosć, za swójski zawod wabić. Wosebje rjemjeslniske ­zawody spytachu z połnej paru a jara zajimawymi poskitkami, šulerjow za swoje powołanje wabić. Šulerjo wuspytachu so na mnohich polach. Zajim, jónu woprawdźe rjemjeslniske powołanje wukonjeć, pak pobrachuje. Tak to znajmjeńša na mje skutkowaše. Jako so ze zastupjerku sakskeje šule rybarstwa rozmołwjach, je so mi wujasniło, kajka wulka je dźěra wědy. Mnozy ani njewědźa, kak karp wupada, kotryž poprawom přeco wokoło hód pola wowki k wobjedu syda. Tohorunja młodostni njewědźachu, što hłowne štyri družiny žita su. To pokazuje, zo husto samo we wjesnych kónčinach na zwisku k rjemjeslniskim a ratarskim powołanjam klaca. Hdyž je hižo tak ćežko, młodostnych z wjesnych kónčin za tajke powołanja inspirěrować, kak wužadowacy hakle je, zajim pola měšćanskich młodostnych zbudźić. Liza-Marija Cyžec

Berlin (dpa/SN). Socialne medije žiwjenje młodych žonow wobwliwuja a poćežuja. Wo tym je spisowaćelka Sophie Passmann (30) přeswědčena. „Wašnje, kak so młode žony w žiwjenju pohibuja, njeje socialnych medijow dla hižo tak jednore kaž něhdy“, Passmann rjekny. „Žony su konserwatiwniše, na konsum orientowane a dźiwaja jara na to, kak móhli na muži atraktiwnišo skutkować a na kotre ­wašnje muskemu widej wotpowěduja. Móžne wujasnjenje tutoho zjawa móhli internetne platformy kaž Instagram a Tiktok być. „Tute algoritmy wuzběhuja w prěnim ­rjedźe šwižne, běłe, symetriske, atraktiwne a rjane žony.“ Młoda žona w bikiniju skutkuje wo wjele lěpje hač namołwa k wólbam krajneho sejma.

Tole je zjaw, kotryž so sam spřećiwja: Po wobsahu chcedźa žony w socialnych medijach wuspěšne być. Na druhim boku pak dyrbja tež atraktiwne być a so tak prezentować, zo so mužam lubja.“ Lěta 2023 je Sophie Passmann roman „Pick Me Girls“ wozjewiła. Nětko su z toho dźiwa­dłowu wersiju spisali, kotruž 17. oktobra w Berlinje předstaja. Wona rysuje, kak muski wid žiwjenje žonow wobwliwuje.

We wobłuku projekta „Městnosće žonow w Braniborskej“ su minjeny pjatk w Cazowje wopomnjensku taflu za Marjanu Domaškojc swjatočnje wotkryli. Mjez přitomnymi bě tež župan dr. Pětš Šurmann (2. wotprawa). Z projektom dopominaja na stawizny a skutkowanje wuznamnych žonow. Informaciske tafle tutoho razu su mjeztym po cyłej Braniborskej připrawjene. Nowu taflu w Cazowje nastorčiła je serbska dźěłowa skupina „Serbske wokno“ w Gołkojcach, kotraž je zdobom zamołwita za serbske naležnosće. Projekt „Městnosće žonow w Braniborskej“ je lěta 2010 nastał. Rada za žónsku politiki Braniborskeje jón podpěruje. Foto: Domowina/Božena Šimanec

Leuna (dpa/SN). W saksko-anhaltskim Leuna nastawa po wšěm swěće najwjetša slědźenska připrawa za syntetiske ćěriwa, tak mjenowane e-fuels. Němski centrum za lětarstwo a swětnišćowe slědźenje (DLR) wukonja z tutej připrawu pioněrske dźěło, rjekny zwjazkowy minister za wobchad Volker Wissing (FDP) při symboliskim prěnim zarywje. „Dopóznaća, kotrež tule zdobudźemy, tomu přinošuja, zo so swojim klimowym zaměram zbližimy.“ Nowy zawod w měsće Leuna k tomu přinošuje, nowe ćěriwa wuwiwać a wobstejace technologije polěpšić.

Wosebje w lětarstwje chcedźa z produkciju nowych z ekomilinu produkowanych ćěriwow wustork wuhlikoweho dioksyda znižić. Nimo toho chcedźa docpěć, zo njenastawaja při spalenju ćěriwa wjace proch a sazy. Technologiska platforma ma wob lěto 2 500 tonow ćěriwa produkować. „Tule dźe wo ćěriwa přichoda a wosebje wo směrodajne technolo­gije“, rjekny jednaćel zawoda Infraleuna Christoph Günther. Zwjazk projekt z 130 milionami eurow spěchuje. Wot lěta 2028 chcedźa slědźenskemu projektej dalše srědki přewostajić.