Berlin (dpa/SN). Po zwrěšćenju tarifowych rozmołwow za sobudźěłaćerjow zjawneje słužby Zwjazka a komunow je komisija wujednawarjow dźensa swoje dźěło zahajiła. Pod nawodom bywšeho hessenskeho ministerskeho prezidenta Roland Kocha (CDU) a něhdyšeho Bremenskeho měšćanskeho radźićela Hansa-Henninga Lühra ma komisija w běhu tydźenja kompromis namakać. Při tym dźe wo dochody wjace hač 2,5 milionow přistajenych. Komisija schadźuje so na njeznatym městnje. Hdyž změje wona namjet dojednanja zdźěłany, chcedźa tarifowi partnerojo znowa wuradźować. W času wujednanja su warnowanske stawki zakazane. Dźěłarnistwo žada sej wosom procentow wjace mzdy. Komuny to wotpokazuja.

Berlin (dpa/SN). Prěni wotrězk koaliciskich jednanjow unije CDU/CSU a SPD je prawdźepodobnje wotzamknjeny. Dźěłowe skupiny mějachu dźensa hač do 17 hodź. wuslědki swojich wuradźowanjow pisomnje předpołožić. Přichodne dny chcedźa material přehladać a do zhromadneho koncepta zwjesć.

Hišće do přichodneho kónca tydźenja wuradźuje potom tak mjenowane koło 19 wobdźělnikow. Jemu přisłušataj mjez ­druhim generalny sekretar CDU Carsten Linnemann a minister za zakitowanje ­Boris Pistorius (SPD). W kole chcedźa wosebje wo tym wuradźować, kak móhli najwjetše problemy wobeju stron rozrisać.

Wulke diferency su so po internych informacijach na polu dawkow, socialneje politiki a při wobmjezowanju njeregularneje migracije wujewili. Raznje su na přikład wo legalizowanju wotehnaća diskutowali, štož sej SPD žada.

Hač do prěnjeho tydźenja apryla chcedźa wšitke njejasnosće rozrisać. Jutry chce předsyda CDU Friedrich Merz nowe knježerstwo předstajić.

Před dźesać lětami němske lětadło w francoskich Alpach znjezbožiło

Le Vernet/Haltern (dpa/SN). To bě jedna z najwjetšich katastrofow w stawiznach europskeho ciwilneho lětarstwa: Dźesać lět po zražce mašiny předewzaća Germanwings lećicy do Düsseldorfa su dźensa z kwětkami a modlitwami wopory wopominali. 150 ludźi je 24. měrca 2015 při zražce w francoskich Alpach ­žiwjenje přisadźiło. Policija je přeswěd­čena, zo je psychisce chory němski pilot katastrofu wotpohladnje zawinował, zo by sej žiwjenje wzał.

Tójšto přiwuznych woporow je składnostnje róčnicy k městnu njezboža njedaloko gmejny Le Vernet w francoskim departemenće Alpes-de-Haute-Provence přijěło. Lufthansa a jeje wotnožka Germanwings kóžde lěto tam na wopomi­nanje přeprošujetej.

W Němskej zarjadowachu najwjetše wopominanje w městačku Haltern am See na sewjernej kromje Poruhrskeje. Před dźesać lětami sedźeše skupina šulerjow z małeho městačka w Airbusu, kiž po puću z Barcelony do Düsseldorfa do hórskeje skały zrazy.

Wobšěrna paleta temow, čiłe a zdźěla dosć kontrowersne diskusije, wuběrnje planowane wotběhi, wjace hač 150 a z tym přewjele wobdźělnikow, hač zo móhli so tu wšitcy mjenować (předewšěm moderatorki wuměnow, čłonki dźěłarničku wuhotowaceho eksploratiwa StudioLab „Arbeit an ­Arbeit“ a nic naposledk za kulisami čestnohamtsce skutkowacy studowacy njech awtorej tychle linkow za zło njebjeru, zo so do rozprawy namakali njejsu) – prěni forum „Serbske žiwjenske rumy w digitalnej dobje“ smě so jako poradźeny zjimać. Zo chcedźa hladajo na wotpohladane pokročowanje nimo akademikarjow, (IT-)fachowcow a kulturnikow tež tych bóle zapřijeć, na kotrychž so digitalne poskitki w prěnim rjedźe měrja, potajkim tak mjenowanych wužiwarjow, je najskerje najwažniše dopóznaće po premjerje. Dalši šrubik, na kotrymž měło so – rady digitalnje – trochu wjerćeć, nastupa rěčane słowo. Štož so ­tónraz skerje připódla jewješe, bě mje­nujcy: serbšćina. Bosćan Nawka