„Europsku integraciju w praksy dožiwić“
Wustajeńca „Wobrazy krajiny – Podobe pokrajine – Bilder einer Landschaft. Přechod – Prehod – Übergang 03“ je zakónčena. Finisažu třikrajoweje přehladki, na kotrejž běchu wuměłcy z Łužicy, Awstriskeje a Słowjenskeje wobdźěleni, wotměchu minjeny pjatk z čitanjom w Galeriji Brandenburg a předwčerawšim z wodźenjom po Choćebuskim Serbskim muzeju.
Choćebuz (mbc/SN/bn). Čitanje w Galeriji Brandenburg – špatneho wjedra dla njebě poprawom pod hołym njebjom planowane zarjadowanje móžne – wuhotowachu Lubina Hajduk-Veljkovićowa, Cvetka Lipuš, Anja Golob a Jill-Francis „Źilka“ Ketlicojc. Moderatorka Anja Zachariasojc kóždu spisowaćelku skrótka předstaji, na čož literatki so wotměnjejo swójske twórby w originalnej rěči kaž tež w delnjoserbskim a/abo němskim přebasnjenju resp. přełožku předstajichu.
Dalše represalije w Běłoruskej
Waršawa/Minsk (SN/bn). Internetny wustup najstaršeho běłoruskeho dźenika Naša Niwa je offline. Po informacijach zjawnoprawniskemu pólskemu rozhłosej přisłušaceho telewizijneho sćelaka Belsat TV jedna so wo „naprawu běłoruskeho ministerstwa za informacije“, z kotrejž chcedźa redakciju nowiny dla šěrjenja pječa „wopačnych informacijow na internetnej stronje pochłostać“.
Hižo minjeny štwórtk su zastojnicy stata běrowy redaktorow kaž tež bydlenja wjacorych sobudźěłaćerjow Našeje Niwy přepytowali. Dotal dokładnje njeznata ličba žurnalistow bu w tym zwisku tuchwilu zajata. Kaž internetny kanal , njeoficialna to drje wotnožka tohorunja wjace njepřistupneho portala , zdźěla, staj mjez zajatymi mjez druhim bywši wiceprezident běłoruskeho PEN-kluba Andrej Dynko a wospjet šefredaktor dźenika Jegor Martinowič. Jimaj wumjetuja, zo staj protesty sobu organizowałoj, z kotrymiž běchu so dźesaćitysacy wobydlerjo najprjedy přećiwo wuslědkej wólbow prezidenta w lěće 2019 a na to režimej scyła spřećiwjeli.
Zahrate – rozrěčane – rejowane
Z wosebitej hudźbnej chłóšćenku pod hesłom „Zahrate – rozrěčane – rejowane“ a zdobom na wužadowace wašnje rozžohnowa so minjenu njedźelu w Budyskej tachantskej cyrkwi swj. Pětra cyrkwinskohudźbny direktor Friedemann Böhme po 32 lětach spomóžneho skutkowanja jako kantor katolskeje wosady. W tym času běše wón tež woblubowany rjad „Duchowna hudźba“ přez lěta organizatorisce zawěsćił a je jón zdźěla tež wuhotował.
Na pišćelach preciznje a w originalnej formje wot Friedemanna Böhme zahrata a ze słowami Drježdźanskeje hudźbneje wědomostnicy Claudije Lubkoll derje wujasnjena twórba Johanna Sebastiana Bacha „Passacaglia a fuga c-moll“ steješe w srjedźišću nyšpora z duchownej hudźbu. Technisce zdokonjane pokaza na to Michał Cyž widejo z wurězkami rejowaneje orchestroweje wersije Bachoweje twórby, live natočeneje lěta 2005 w Opérje National de Paris.
„Ničenje přirody w Mužakowskej holi je bjez runjeća“
Budyšin (SN/bn). Pod hesłom „Pohlady“ je Serbski ludowy ansambl nowy format hudźbno-filmoweho wječora ze slědowacej podijowej rozmołwu předstajił. Něhdźe 30 wopytowarjow dožiwi w tym wobłuku wčera w Budyskej Röhrscheidtowej bašće – dešća dla njebě na byrgarskej zahrodźe planowane zarjadowanje pod hołym njebjom móžne – takrjec dwójnu premjeru. Prěni raz pokazachu loni dokónčeny dokumentariski krótkofilm Maje Nageloweje a Juliusa Günzela „winterlieb – libawka“ před publikumom na městnje. Pask je pokročowanje produkcije „blaubeeren – cerne jagody“ z lěta 2013, z kotrymž běchu filmowy dźěl wječora zahajili. „Smój paskaj samaj prěni raz pospochi widźałoj. Sym tola překwapjeny, zo wonej takle pokazanej hišće wjace skutkownosće nabywatej“, Günzel po předstajenju zjima. Nagelowa na to skedźbni, zo „je nimale wša krajina, kotruž smój dokumentowałoj, mjeztym preč. Zwostała je jeničce wulka dźěra.“
Kreatiwni šulerjo
„Naša serbska kniha“ – pod tutym hesłom pokročuje Ludowe nakładnistwo Domowina ze swojim wosebitym projektom za literarny dorost. Po wuspěšnym zazběhu lěta 2019 ze šulerjemi Serbskeje wyšeje šule Ralbicy nasta nětko nowostka z 8. lětnikomaj Serbskeho gymnazija Budyšin (SGB), a to jako brošura pod titulom „Cyłe lěto – jedna kniha“.
Awtorojo a ilustratorojo smědźachu swoju kreatiwnu žiłku na polu lyriki a ilustracije połnje wužiwać. Knižna premjera budźe wutoru, 13. julija, w 9.30 hodź. w SGB, hdźež chcedźa publikaciju přichodnje tež předawać.
Němsko-Serbske ludowe dźiwadło wuhotuje wulkeho naprašowanja dla ...
Swjedźenske koncerty w duchu Europy
Hudźbne wopominanje załoženja zwjazka šesćiměstow a prěnjeho naspomnjenja Lubija
„Jubileje skića přiležnosć, wšědny dźeń raz pozastać a před pozadkom zańdźenosće nowe perspektiwy na přichod wuwiwać. Z koncertami přeprošamy k tomu, na słowjanske a sakske stawizny našich městow a zwjazka šesćiměstow zhladować.“ Tele słowa hudźbneho direktora ewangelsko-lutherskeho cyrkwinskeho wobwoda Christiana Kühneho dosć derje wopisuja, kotra zasadna myslička so za spočatk julija wotmětymi třomi swjedźenskimi koncertami w Kamjenskej cyrkwi swj. Marje, Žitawskej cyrkwi swj. Jana a Lubijskej cyrkwi swj. Mikławša chowa.
Žur znowa publikumowy magnet
Nowa multimedialna wustajeńca „Zwinger Xperience – Macht. ...
Nowy hudźbny rjad w Budyšinje
Towarstwo Budyski ekumeniski tachantski wobchod njewobhospodarja jenož předawanišćo a zetkawanišćo samsneho mjena Při mjasowych jětkach, ale wuhotuje tež najwšelakoriše zarjadowanja. W tym zwisku najnowši prawidłowny rjad rěka „Unplugged w Budyšinje“.
Budyšin (SN/bn). „Poprawom smy jenož mały hudźbny rjad z koncertami a slědowacymi wólnymi rozmołwami we wobchodźe planowali. Bohudźak a na zbožo su so koronowe ličby w juniju derje wuwili, štož je nas pohnuło zarjadowanja trochu rozšěrić. Dźakowano tež přidatnej podpěrje Rotary-kluba Bautzen/Budyšin móžemy rjad nětko zahajić“, w nowinskej zdźělence towarstwa rěka.
Hesło noweho rjadu „Unplugged w Budyšinje“ hižo přeradźa, što na wopytowarjow čaka: Hudźba, předstajena „bjez wulkeje zwukoweje techniki a přewažnje ryzy akustisce“. Koncerty wuhotuje towarstwo měsačnje stajnje póndźelu w 19.30 hodź. na měnjacych so hrajnišćach. Rotary-klub zaběra rólu prezentatora, kooperaciscy partnerojo ekumeni- skeho wobchoda budu mějićeljo resp. najenkojo jednotliwych městnosćow.
