New York je pisane město, tam słyšiš mnohe rěče a dožiwješ wšelake kultury a narodnosće. Tež serbsku rěč móžeš w ameriskej metropoli słyšeć – to je team WUHLADKA njedawno nazhoniło. WUHLADKO předstaji Serba w New Yorku, sobotu, 2. nowembra, 11.45 hodź. w MDR telewiziji. – Serbski profesor w New Yorku čita a rozłožuje stare teksty wuznamnych filozofow kaž Platona a Aristotelesa – a je na tutym polu drje ­jedyn z najwuznamnišich ekspertow po cyłym swěće. Marko Malink dźěła jako profesor filozofije a klasiskeje filologije na uniwersiće w New Yorku. Ze swojej młodej swójbu bydli wosrjedź města na wuchodźe USA – zwisk k domiznje pak njeje ženje zhubił. Ze swojej jednolětnej dźowku rěči serbsce a wobstajnje sćěhuje powěsće ze swojeje łužiskeje domizny. WUHLADKO předstaji serbskeho ekspertu na polu starogrjekšćiny a je rodźeneho Budyšana w New Yorku wopytało.

Zabyte wuměłstwo

Ćežišćo telewizijneho magacina Łužyca w oktobrje je jubilejna 40. schadowanka, kotraž wotmě so njedawno w Choćebuzu, a to w tamnišim Braniborskim krajnym muzeju za moderne wuměłstwo. Na samsnym městnje je so moderator Christian Mathée po wustajeńcy Helle Stoletzki rozhladował. Nimo toho wusyłaja wurězki interviewa, kotryž je Mathée z projekt Zorja sobu organizowacym Maksimilianom Hasackim wjedł a kotryž je prěnja rozmołwa noweho, ryzy digitalnje přistupneho formata „Łužyca w rozgronje“.

Telewizija RBB pokaza magacin jutře, sobotu, w 13.10 hodź. Wospjetowanje na samsnym sćelaku slěduje wutoru, 22. oktobra, w 3.40 hodź. Telewizija MDR pokaza Łužycu sobotu, 26. oktobra, w 11.45 hodź. W mediatece ARD je magacin wot jutřišeho cyłe lěto kóždy čas přistupny.

Štyri lěta dyrbja serbscy fanojo kopańcy hišće čakać – hač k přichodnej Europeadźe. Ale přiwšěm je hosćićel za přichodny turněr hižo namakany. 2028 hraja w sewjernej Italskej, pola słowjenskeje a frijawlskeje mjeńšiny. Turněr twori w oktobru ćežišćo telewizijneho magacina Wuhladko. Dale wobswětla we wusyłanju mjeztym 30 lět wobstawace serbske młodźinske towarstwo Pawk, w „dwurěčnych wsach při Klóšterskej wodźe“ skutkowaceho wobydlerskeho policista Andréja Kobera kaž tež spočatki a wuwiwanje serbskeje telewizije za dźěći, „kotraž je so w minjenych 30 lětach chětro změniła“.

Telewizija MDR pokaza Wuhladko jutře, sobotu, w 11.45 hodź. Wospjetowanje na samsnym sćelaku slěduje póndźelu, 7. oktobra, w 6.45 hodź. Telewizija RBB wusyła magacin sobotu, 12. oktobra, w 13.35 hodź. W mediatece ARD je Wuhladko wot jutřišeho cyłe lěto kóždy čas přistupne. 

Hłowne ćežišćo telewizijneho magacina Łužyca w septembru je nałožk łapanja kokota. We wobłuku lětušeho Braniborskeho žnjoweho a wjesneho swjedźenja w Hochozy je so moderator wo pozadkach tradicije wobhonił, wo „kotrejž najmjenje ludźi woprawdźe wě, zwotkel pochadźa“. Dalši přinošk wobswětla stare rjemjesło módroćišća, kotrež „drje dźeń a wjace předewšěm młodych ludźi zajimuje, wotpowědna wěda pak so přiwšěm přiběrajcy zhubja“. Magacin portretuje skupinku entuziastow, kotraž chce tomu z pomocu specifiskich dźěłarničkow zadźěwać.

Telewizija RBB pokaza Łužycu jutře, sobotu, w 13.35 hodź. Wospjetowanje ­na samsnym sćelaku slěduje srjedu, 25. septembra, w 2.15 hodź. Telewizija MDR wusyła magacin sobotu, 28. septembra, w 11.45 hodź. W mediatece ARD je Łužyca wot jutřišeho cyłe lěto kóždy čas přistupna.