Digitalizacija a tykanc
Digitalizacija je ćežišćo telewizijneho magacina Łužyca w měrcu. Mjez druhim wěnuja so aktualnymaj serbskimaj předčitanskimaj funkcijomaj a přichodnje móžnej nawigaciji w serbšćinje. Dale předstaja projekt „Drastwa digitalnje“ kaž tež kompjuteroweho pioněra Mikławša Joachima Wićaza. Nimo toho wobswětla we wobłuku rjadu „Paula wari“ zwisk mjez „zymnej mulku“ a serbskej tradiciju.
Telewizija RBB pokazuje Łužycu jutře, sobotu, w 13.35 hodź. Wospjetowanje na samsnym sćelaku slěduje srjedu, 19. měrca, w 2.55 hodź. Telewizija MDR wusyła magacin sobotu, 22. měrca, w 12 hodź. W mediatece ARD je Łužyca wot jutřišeho cyłe lěto kóždy čas přistupna.
Nory, zyma a worjoł
„Pjaty počas“ je z ćežišćom telewizijneho magacina Wuhladko w měrcu. Wosebje w fokusu stejitej hornjołužiskej srjedźišći norow Kulow a Njebjelčicy. Dalšej přinoškaj wěnuja rozdźělnymaj aspektomaj rozžohnowacej so zymje. Pod hesłom „Dźěłać w zymskej idylce“ portretuja młodu Serbowku Lizu-Marju Cyžec, kotraž dźěła tuchwilu w hotelu w Alpach. Trochu bliže, mjenujcy w Sulšecach, wotmě so njedawno prěni serbski biatlon jako „Zymski sport bjeze sněha“. Kamerownicy su wobrazy zapopadnyli a sposrědkuja impresije. Nimo toho wobswětla archeologisku sensaciju, kotraž na „Serbske korjenje němskeho woponoweho zwěrjeća“, mjenujcy mórskeho worjoła, pokazuje.
Telewizija MDR wusyła Wuhladko jutře, sobotu, w 12 hodź. Wospjetowanje na samsnym sćelaku slěduje póndźelu, 3. měrca, w 6.50 hodź. Telewizija RBB pokaza magacin sobotu, 8. měrca, w 13.25 hodź. W mediatece ARD je Wuhladko wot jutřišeho cyłe lěto kóždy čas přistupne.
Wólby, šule a portretaj
Bližace so wólby Zwjazkoweho sejma su z ćežišćom telewizijneho wusyłanja magacina Wuhladko w februaru. Wosebje w fokusu steja přihoty w zarjadnistwach dwurěčnych komunow, kotrež maja wólbne podłožki rozesłać kaž tež wólbne lokale a wotpowědny personal organizować. Dalša tema su prawicarske a antiserbske tendency, kajkež serbscy młodostni hižo dlěje nic jenož w towaršnosći, ale přiběrajcy tež na dwurěčnych šulach regiona wobkedźbuja.
Wusyłanje wudospołnitej portretaj. Pod hesłom „Wot gulašoweje kanony k woclowemu gigantej“ wobswětluja blisko Pěskec zaměstnjenu firmu Ziegler, kotraž słuša k najwjetšim dźěłodawarjam w Hornjej Łužicy a kotraž zdawa so konjunkturnej krizy wuspěšnje spřećiwjeć. Dale předstaja Radworčanku Marju Henglowu, kotraž sej płachtakujo po morjach swěta žiwjenski són spjelnja – zhromadnje ze swojim mandźelskim a dźěsćomaj, kotrejž na łódźi sama wuwučuje, a to tež w předmjeće serbšćina.
Portret prócowarja
Telewizijny magacin Łužyca wěnuje so w januarje „sobu najwuznamnišim zachowarju delnjoserbšćiny, kotryž pak je dźensa nimale zabyty“. Tež tohodla staj Ingrid Neumanojc a Wolfgang Albus dokumentariski filmowy portret „Swěte smužki Serbow“ wo Gołkojskim fararju Bjedrichu Frycu nawjerćałoj. Mjez druhim bě za čas wójny mjez Pruskej a Sakskej Stary zakoń přełožił a sporje pjenjezy za ćišć organizował. Tak „přinošowaše njesměrnje zdźerženju a dalewuwiću delnjoserbskeje rěče“.
Telewizija RBB pokaza Łužycu jutře, sobotu, w 13.10 hodź. Wospjetowanje na samsnym sćelaku slěduje srjedu, 22. januara, w 2.45 hodź. Telewizija MDR wusyła magacin sobotu, 25. januara, w 10 hodź. W mediatece ARD je Łužyca wot jutřišeho cyłe lěto kóždy čas přistupna.
Nowy wusyłanski čas
Hłowny přinošk telewizijneho magacina Wuhladko w januarje wěnuje so wjerškam, kotrež so lětsa w Chrósćicach wotměja: „Hač 800. róčnica prěnjeho pisomneho naspomnjenja wsy, Mjezynarodny folklorny festiwal Łužica abo pasion w nazymje – na wobydlerjow čaka na podawki bohate, ale zawěsće tež napinace lěto“. Dale wobswětla „naročny rěčny program DOMOJ, kotryž ma wobdźělnikam zmóžnić, sej serbšćinu w dźewjeć měsacach přiswojić“ kaž tež koncert „Serbske bands & fans“, kotryž je njedawno wjace hač 700 wopytowarjow do Chróšćanskeje wjacezaměroweje hale „Jednota“ přiwabił. Składnostnje „tragiskeje smjerće Jana Skale před 80 lětami“ spominaja nimo toho z portretom na „žurnalista, politikarja, spisowaćela a prěnjeho Serba, kiž je na sćěhi industrializacije za Łužicu spočatk 20. lětstotka skedźbnił“.
Telewizija MDR pokaza Wuhladko jutře, sobotu, tónraz (a wotnětka stajnje) w 12 hodź. Wospjetowanje na samsnym sćelaku slěduje póndźelu, 6. januara, w 6.55 hodź. Telewizija RBB wusyła magacin sobotu, 11. januara, w 13.35 hodź. W mediatece ARD je Wuhladko wot jutřišeho cyłe lěto kóždy čas přistupne.
Nowy knjez a jubilejej
Ćežišćo telewizijneho magacina Wuhladko je jubilejna 150. schadźowanka. Wosebje w fokusu steji „namołwa organizatorow, so za swjatk serbsce zdrasćić, pak klasisce pak w indiwiduelnej, modernej warianće“ a z toho rezultowace prašenje, „do kotreje měry smě so tradicionelna serbska drasta změnić?“ Nimo toho portretuja Guida Budarja, kiž je wot klětušeho „nowy knjez nad Klóšterskim lěsom Marijina hwězda, a gratuluja Pěskowčikej k 65. narodninam.
Telewizija MDR wusyła Wuhladko jutře, sobotu, w 11.45 hodź. Wospjetowanje na samsnym sćelaku slěduje póndźelu, 9. decembra, w 6.40 hodź. Telewizija RBB pokaza Wuhladko sobotu, 14. decembra w 13.30 hodź. W mediatece ARD je magacin wot jutřišeho cyłe lěto kóždy čas přistupny.
Wólbow dla tydźeń zašo
Festiwalowy přinošk
Nowemberske wusyłanje telewizijneho magacina Łužyca pokaza film „Serbska utopija II: Wěšćenje“, kotryž bu njedawno prapremjenje we wobłuku 34. Choćebuskeho filmoweho festiwala předstajeny. Produkcija Erika Šyški wopřijima přez ramikowe jednanje zwjazane krótkofilmy „Plapotaŕka“ Ugura Yildrima, „Wótlew & pśilew“ Sofije Cyžec a „Krabat 3 000“ Michała Brylskeho.
Telewizija RBB wusyła Łužycu jutře, sobotu, w 13.35 hodź. Wospjetowanje na samsnym sćelaku slěduje srjedu, 20. nowembra, w 2.45 hodź. Telewizija MDR pokaza magacin sobotu, 23. nowembra, w 11.45 hodź. W mediatece ARD je Łužyca wot jutřišeho cyłe lěto přistupna.
Z New Yorka do Łužicy
New York je pisane město, tam słyšiš mnohe rěče a dožiwješ wšelake kultury a narodnosće. Tež serbsku rěč móžeš w ameriskej metropoli słyšeć – to je team WUHLADKA njedawno nazhoniło. WUHLADKO předstaji Serba w New Yorku, sobotu, 2. nowembra, 11.45 hodź. w MDR telewiziji. – Serbski profesor w New Yorku čita a rozłožuje stare teksty wuznamnych filozofow kaž Platona a Aristotelesa – a je na tutym polu drje jedyn z najwuznamnišich ekspertow po cyłym swěće. Marko Malink dźěła jako profesor filozofije a klasiskeje filologije na uniwersiće w New Yorku. Ze swojej młodej swójbu bydli wosrjedź města na wuchodźe USA – zwisk k domiznje pak njeje ženje zhubił. Ze swojej jednolětnej dźowku rěči serbsce a wobstajnje sćěhuje powěsće ze swojeje łužiskeje domizny. WUHLADKO předstaji serbskeho ekspertu na polu starogrjekšćiny a je rodźeneho Budyšana w New Yorku wopytało.
Zabyte wuměłstwo
Schadowanka a Zorja
Ćežišćo telewizijneho magacina Łužyca w oktobrje je jubilejna 40. schadowanka, kotraž wotmě so njedawno w Choćebuzu, a to w tamnišim Braniborskim krajnym muzeju za moderne wuměłstwo. Na samsnym městnje je so moderator Christian Mathée po wustajeńcy Helle Stoletzki rozhladował. Nimo toho wusyłaja wurězki interviewa, kotryž je Mathée z projekt Zorja sobu organizowacym Maksimilianom Hasackim wjedł a kotryž je prěnja rozmołwa noweho, ryzy digitalnje přistupneho formata „Łužyca w rozgronje“.
Telewizija RBB pokaza magacin jutře, sobotu, w 13.10 hodź. Wospjetowanje na samsnym sćelaku slěduje wutoru, 22. oktobra, w 3.40 hodź. Telewizija MDR pokaza Łužycu sobotu, 26. oktobra, w 11.45 hodź. W mediatece ARD je magacin wot jutřišeho cyłe lěto kóždy čas přistupny.
Kopańca, pólcaj a Pawk
Štyri lěta dyrbja serbscy fanojo kopańcy hišće čakać – hač k přichodnej Europeadźe. Ale přiwšěm je hosćićel za přichodny turněr hižo namakany. 2028 hraja w sewjernej Italskej, pola słowjenskeje a frijawlskeje mjeńšiny. Turněr twori w oktobru ćežišćo telewizijneho magacina Wuhladko. Dale wobswětla we wusyłanju mjeztym 30 lět wobstawace serbske młodźinske towarstwo Pawk, w „dwurěčnych wsach při Klóšterskej wodźe“ skutkowaceho wobydlerskeho policista Andréja Kobera kaž tež spočatki a wuwiwanje serbskeje telewizije za dźěći, „kotraž je so w minjenych 30 lětach chětro změniła“.
Telewizija MDR pokaza Wuhladko jutře, sobotu, w 11.45 hodź. Wospjetowanje na samsnym sćelaku slěduje póndźelu, 7. oktobra, w 6.45 hodź. Telewizija RBB wusyła magacin sobotu, 12. oktobra, w 13.35 hodź. W mediatece ARD je Wuhladko wot jutřišeho cyłe lěto kóždy čas přistupne.
