Budyšin/Połčnica (SN/at). Wuslědki lětušich wólbow zwjazkoweho sejma začuwaja tež křesćanscy demokraća w Budyskim wokrjesu jako bolostne. Teritorij tudyšeho wokrjesneho zwjazka CDU słuša hłownje k wólbnemu wokrjesej 156, w kotrymž je CDU direktny mandat zhubiła. Tón zdoby sej kandidat AfD Karsten Hilse. Na wokrjesnym stronskim zjědźe w formje sobustawskeje plenarneje zhromadźizny chcedźa sobotu w Połčnicy wo tym wuradźować, što měli činić, zo bychu wobydlerjo Budyskeho wokrjesa stronje CDU zaso bóle dowěrjeli.
Slepo (SN/mwe). W swojim najnowšim informaciskim łopjenu rozprawja towarstwo Serbski kulturny turizm (SKT) wo tym, zo ma Choćebuski Serbski muzej nowu internetnu prezencu. Tak bě zamołwita za serbske naležnosće města Choćebuza Anna Kosacojc-Kozelowa na njedawnej měšćanskej zhromadźiznje „na nowu, jara atraktiwnu a derje poradźenu internetnu prezencu“ pokazała. Tuchwilu drje muzej hišće přetwarjeja, „po wobšěrnym saněrowanju wustajenskich rumnosćow kaž tež po bjezbarjernym wutwarje wita wopytowarjow, a to po wšěm zdaću klětu, moderna a načasna wustajeńca ke kulturnym stawiznam Serbow w Delnjej Łužicy“, kaž w informaciskim łopjenu SKT rěka. Hač do toho su zarjadowanja a wosebite wustajeńcy Serbskeho muzeja dale w Choćebuskim měšćanskim muzeju.
Praha (ČŽ/K/SN). Hižo mała bjezdźěłnosć w Čěskej je w oktobru znowa woteběrała – z 3,8 na 3,6 procentow. Tole wozjewi Dźěłowy zarjad Čěskeje republiki (ÚP). Mjenje bjezdźěłnych je w Čěskej naposledk 1997 było. Tehdy bě w decembru něhdźe 269 000 muži a žonow zasłužbu pytało, tuchwilu přibližnje 271 000. Dźiwajo na to, zo poskićeja cyłkownje něhdźe 210 000 swobodnych městnow, přińdu na jedne z nich 1,3 próstwarjo. Nastupajo regiony je w Plzeňskim wobwodźe bjezdźěłnosć z 2,3 procentami dale najmjeńša. Morawsko-šleski wobwod ma z 5,6 procentami porno tomu najwjac dźěło pytacych, Karvinski steji při tym z 8,4 procentami bjezdźěłnych na čole.
Po informaciji ÚP běchu předewzaća a firmy najbóle na twarskich dźěłaćerjach, monterach, pomocnikach w produkciji, šoferach nakładnych awtow, rjedźerkach, kucharkach kaž tež skowarjach zajimowane. Hłowny ekonom Lukáš Kovanda liči z tym, zo so bjezdźěłnosć tež hišće w nowembru pomjeńši, a to na 3,5 procentow. W decembru wočakuje wón potom snadnje zwyšenu kwotu.
Přirodoškitna krajina „Słomjeńska hola“ je 303,64 hektarow wulka. Na wuchodźe wobmjezuje ju železniska čara Choćebuz-Zhorjelc, na zapadnym Sprjewja. Sewjerojužne rozšěrjenje saha wot Grodkowskeho kanuwoweho domu hač k Sprjejčanskej niwje. Tam zapołoženy je něhdźe 20 hektarow wulki přirodoškitny teren „Slamener Kuthen“. W nim maja hišće wulki wobstatk niwoweho lěsa kaž tež mnohe rědke rostliny a zwěrjata. Prěnje wozjewjene přinoški wo kónčinje su z lěta 1879. W lěće 1900 bu region prěni króć kartěrowany. Ale hakle 1974 započachu so intensiwnišo z wuslědźenjom Słomjeńskeje hole zaběrać. Překwapjeni běchu tehdy wo bohatosći orchidejow, kotrež tam rosćechu. Prjedy wšak wužiwachu ležownosć tež jako wočerstwjenišćo. Tak mějachu tam w zymje sněhakowarsku čaru a móžnosće sankowanja. Drětwja (Zerre) wabješe w 1960tych lětach ludźi do přirodneho kupanišća při Sprjewi. W bliskosći zaměstnichu we wili jednoho něhdyšeho Grodkowskeho předewzaćela hač do lěta 1968 pěstowarnju za dźěći dźěławych Dubrawskeje (Trattendorf) milinarnje, a něhdyši SED-šef z płunokombinata natwari sej w holi swoju daču.
Chrósćicy (JK/SN). Po lěta trajacych přihotach a z tójšto přidatnym dźěłom gmejnskich sobudźěłaćerjow kaž tež tych w zarjadniskim zwjazku Při Klóšterskej wodźe móžachu Chróšćanscy gmejnscy radźićeljo na swojim zašłym posedźenju skónčnje zahajensku bilancu gmejny k 1. januarej 2013 wobzamknyć. Tajku bilancu nastajić bě trjeba, dokelž su komuny winowate po tak mjenowanym doppiku, dwójnym knihowanju, dźěłać.
Porchow (AK/SN). Swojej wjesnej syći w Sernjanach a Porchowje chce zaměrowy zwjazk za wopłóčki Při Klóšterskej wodźe (AZV) klětu rozšěrić. Tole předwidźi hospodarski plan, kotryž su zastupjerjo sobustawskich gmejnow wčera jednohłósnje wobzamknyli. W Sernjanach přizamknu na kromje wsy do směra na Róžant 16 twarskich ležownosćow. Za to předwidźa klětu 100 000 eurow. Z toho financuja 25 000 eurow z přinoškow twarcow a 75 000 eurow z kreditow.
W Porchowje ma so w štyrjoch etapach dohromady 52 ležownosćow w dwěmaj nowotwarskimaj štwórćomaj přizamknyć. Tole ma dohromady něhdźe 300 000 eurow płaćić. Zwoprawdźić chcedźa tónle projekt w času wot klětušeho hač do lěta 2020.
Wojerecy (KD/SN). Mnozy młodźi a starši wopytowarjo z regiona dožiwichu minjeny kónc tydźenja we Wojerowskej Łužiskej hali musical „Janka a zmij“, kotryž běštaj tamniša hudźbna a wuměłstwowa šula Bischof a dramaturg Olaf Winkler zhromadnje na nohi stajiłoj.
13lětna Janka (Luca-Maria Oczkowski) přežiwja ze zwadźenymaj staršimaj prózdniny pola dźěda na łužiskej wsy. Radšo hač sej zwadu staršeju naposkać wotkrywa sej wona w knize zemrěteje wowki łužiske powěsćowe figury.
Lutki, błudnički, wódny muž a připołdnica předstajichu so tuž spěwajo a rejujo we wobkuzłacych kostimach a kulisach. Na a za jewišćom skutkowachu čłonojo musicaloweje rjadownje a baletnych skupin towarstwa Łužiska hala. Chór Wojerowskeje zakładneje šule Při Halštrowje wustupi jako spěwace žabki a ryby a staraše so tak wo wjeselo.