Aus der aktuellen Ausgabe vom Mittwoch, 15 November 2017

Plusnikecy (SK/SN). Hač do kónca nowembra ma stejišćo Malešanskeje gmejny k wobłukowemu zawodnemu dojednanju za skału Pro Stein w Plusnikecach předležeć. Štož zda so być zarjadniska naležnosć, njelubych wuskutkow na wokolne wsy dla zjawnosć mjeztym jara zaběra. Tohodla zetkachu so njedawno Malešanski wjesnjanosta Matthias Seidel (CDU) a čłonojo wot apryla skutkowaceje woby­dlerskeje iniciatiwy k zhromadnemu wobjednanju problemow, kotrež skałowy zawod wobydlerstwu a krajinje načinja. Přitomnaj běštaj zapósłancaj Sakskeho krajneho sejma Marko Šiman (CDU) a Hajko Kozel (Lěwica). Hłowny problem je dźeń a wjetše nasypnišćo z wotpadkami mlějernje zornowca.

Wospjet bu kritika zwuraznjena, zo su wot zawoda do nadawka date posudki jednostronske. Po słowach gmejnskeho radźićela dr. Jürgena Wenglera wěrjomnosć posudkow data njeje. Tež Malešanska gmejnska rada je so na swojim zašłym posedźenju ze skału zaběrała.

Budyšin. Stawizniska sekcija Maćicy Serbskeje přeprosy štwórtk, 16. nowembra, w 19.30 hodź. na dalše zarjadowanje do Budyskeho hosćenca „Wjelbik“. Tam přednošuje Alexander Pólk na temu „Wuwiće serbskeho stawiznopisa w NDR-skim času“. Młody serbski stawiznar, bydlacy w Budyšinje, předstaji wuslědki swojeho masterskeho dźěła, kotrež je lětsa­ na Techniskej uniwersiće Drježdźany wotzamknył. Přednošk budźe w serbskej rěči, zastup darmotny.

Zymsku zeleninu wužiwać

Wojerecy. Kak mnohostronsce hodźi so zymska­ zelenina w kuchni wužiwać a spřihotować, budźe tema zarjadowanja jutře, štwórtk, w 10 hodź. na Wojerowskej dźěćacej a młodźinskej farmje. Kaž Křesćansko-socialny kubłanski skutk zdźěli, chcedźa tam recepty předstajić a je z wobdźělnikami zwoprawdźić.

Sadowcy prawje wurězać

Njebjelčicy. Kak maja sadowcy prawje wurězować, nawuknu zajimcy we wosebitym kursu, kotryž wotměje so sobotu, 25. nowembra, wot 9.30 hodź. w Nje­bjelčanskim gmejnskim centrumje. Wobdźělenje płaći na wosobu 15 eurow. Zajimcy njech přizjewja so pod telefo­nowymaj čisłomaj 03578/ 301 006 abo 035796/ 946 13.

Nowoslicy (aha/SN). Hižo dźesać lět přewjeduje župa „Michał Hórnik“ zeńdźenja wjesnych chronikarjow a znajerjow wjesnych stawiznow. Njedawno su do Nowosličanskeho kulturneho doma tež wjesnu zjawnosć přeprosyli.

Dóstanje najwyše chłostanje

Lěskej. Při kontroli spěšnosće zawčerawšim popołdnju na zwjazkowej dróze B 156 w Lěskej lepichu Mercedes, kotryž ze 124 km/h přez wjes smaleše. Na jeho wodźerja čaka nětko najwyše móžne chłostanje za wobchadne delikty: tři měsacy zakaz jězdźenja, pokuta 680 eurow a dwaj dypkaj w Flensburgu.

Rjad „musica nova sorabica“ zwjazuje tradiciju z modernu

Runje tak kaž wuměłstwowu hudźbu druhich narodow wobwliwuja tež serbske hudźbutwórstwo časowe podawki a aktualnosće. Tak rozestajeja so wězo serbscy awtorojo runja druhim z přitomnostnym žiwjenjom, a to w stilu klasiskeje moderny a postmoderny. Ći jedni činja to dosć intensiwnje, tamni skerje łahodnje. Hustodosć čerpaja z kužoła, kotryž njesměł tež w Serbach zaprahnyć: z ludoweje hudźby. Njeje jenož legitimne, ale tworićelstwo spěchowace, tež serbsku ludowu tradiciju z eksperimentalnymi móžnosćemi nowych kompozitoriskich technikow kombinować a tak indiwidualnosć zaručić.

Ludowe melodije wotcuzbnjene

Gerold Gnausch, solowy basowy klarinetist a saksofonist Komiskeje opery w Berlinje, słušeše hižo před lětami sobuiniciatoram projekta „musica nova sorabica“. Lětsa bě wón wospjet na přewjedźenju wšěch třoch koncertow wobdźěleny. Chrysta­ Meškankowa je so z nim rozmołwjała.

Zwotkel přińdźe Waš dobry a dosć wuski poměr k hudźbje Serbow?

G. Gnausch: Pochadźam z Lubija. Swoje zakładne wukubłanje dóstach na Budyskej wokrjesnej hudźbnej šuli. Z Janom Cyžom hrajachmoj tam w samsnym orchestrje. W centralnych pioněrskich lěhwach tele kontakty rozšěrjach. Přede- wšěm přez Koło serbskich hudźbnikow pak zeznach pozdźišo Jura Mětška, Detlefa Kobjelu kaž tež Klětnjana Hinca Roja. Wón spisa za legendarneho wirtuozu Oskara Michallika, čłona našeho Berlinskeho kwarteta, kompoziciju za klarinetu a pišćele, tak zo přińdźech z teje strony z načasnym kompozitoriskim tworjenjom Serbow do hišće wušeho zwiska. Přez Załožbu za serbski lud so zhromadne dźěło dale zesylni a skonkretizowa.

Sokoł Ralbicy/Hórki

– Wojerowski FC 1:1 (0:1)

Zestawa domjacych: Ch. Gloxyn – Rawš, Zynda, Korjeńk, Bjeńš, M. Matka (64. Čórlich), Młynk, Šołta, Janca, Kurjat (46. K. Matka), Domaška

Wojerowscy koparjo přichwatachu minjenu njedźelu do Ralbičanskeho stadiona, zo bychu so za tři poražki w lońšej sezonje – dwójce w lize a jónu w pokalnym połfinalu – rewanšowali. Wot spočatka přewzachu woni tež komando. Sokoljo běchu wosebje w defensiwje prašani, tam pak swoju wěcku porjadnje zmištrowachu. Hrajerjo z Zusoweho města njenamakachu hišće rumy k dobrym składnosćam a hakle po poł hodźinje jewjachu so z dalokej třělwu prěni króć strašnje před klětku domjacych. Chrystof Gloxyn pak dźeržeše (35.). Jenož mjeńšinje pozdźišo Wojerowčenjo wyskachu. Wólny kop ze zdalenosće 25 metrow dźěše přez sokołsku murju. Gloxyn bě drje z porstami hišće při bulu, najebać to so tón jemu přez liniju kuli. Jeničku prawu šansu w prěnim połčasu Sokoljo wužić njezamóchu. Po wólnym kopje zhłójčkowa Fabian Korjeńk bul wróćo do šěsnatki, tam pak so nichtó njenamaka, kiž by jón do syće třělił.

Wokrjesna wyša koparska liga

Kumwałd – Kulow0:1 (0:1)

Ralbicy/Hórki – Wojerecy 1:1 (0:1)

Kinspork/Łužnica – Radwor 4:1 (1:0)

1. SC Großröhrsdorf 12 25  :  3 30

2. Módro-běli Kulow 12 33  : 12 24

3. Wojerowski FC 12 25  : 17 23

4. SG Großnaundorf 11 27  : 16 19

5. LSV Hory 12 28  : 23 19

6. Motor Kumwałd 12 15  : 19 19

7. Rakečanske ST 12 25  : 20 18

8. Sokoł Ralbicy/Hórki 12 16  : 14 18

9. Drohotka Ramnow 11 21  : 19 17

10. ST Hnašecy-Dobruša 12 22  : 24 15

Worklečanscy koparscy přećeljo wróćichu so z prěnjeho cupa ,,Horce-wino“ w Biskopicach ze spokojacym 3. městnom. Hnydom tři nowopřichady běchu kader Viktorije Worklecy zesylni. A woni mějachu wulki podźěl na wuspěchu čornokošlatych. Ronny Wünsche a Šćěpan Herrmann šnórujetaj kopački hewak za ST Módro-běłych Njeswačidło; Měrćin Mark je stajny hrajer w mustwje starych knjezow Zeleno-běli Hórki.