Dejka je za hindu-wosadu wčera w Bremenje twarnišćo za nowy templ pruwowała. „Pola nas je kruwa swjata. Wona je kaž bóh“, wuzběhny wosadny rěčnik Pathmakaran Pathmanathan. Kaž wón rjekny, dyrbješe dejka něhdźe poł hodźiny na ležownosći přebywać. Hdyž so tam derje čuje, je areal dobre městno. Tomu tak bě, budu tam twarić. Wosadźe hinduwow w Bremenje přisłuša po słowach Pathmanathana něhdźe 300 wěriwych swójbow, a za jich kubłanje trjebaja wjac městna.
W portalu eBay poskića předawar zatołkany papjercowy nopašk, z kotrehož je pječa „king rock’n’rolla“ Elvis Presley 1956 rano po koncerće w měsće Tulsa w zwjazkowym staće USA Oklahoma pił. Nopašk je nimo toho signowany. Štyri dny do kónca přesadźowanja steješe najwyši poskitk pola 880 dolarow, štož je něhdźe 720 eurow.
Barcelona (dpa/SN). Wotsadźeny katalanski regionalny prezident móhł tež nowy być. Najwjetšej stronje Katalonskeje, kotrejuž zaměr je njewotwisnosć regiona wot Španiskeje, stej so na podpěru wospjetneje kandidatury Carlesa Puidgemonta za tele zastojnstwo dojednałoj. Wo tym informujetej Puidgemontowa lisćina Junts per Catalunya a lěwicarskonacionalistiska ERC. Zdobom připowědźatej, na prěnim parlamentnym posedźenju hłosować za Rogera Torrenta z ERC. Dotalny měšćanosta katalanskeho městačka měł so z prezidentom parlamenta stać.
Španiski ministerski prezident Mariano Rajoy je hižo póndźelu hrozył, w padźe znowawuzwolenja Puidgemonta nućene zarjadnistwo Katalonskeje podlěšić.
Podstupim (SN/MkWj). Njelubozny podawk, kotryž bě so w nowembru w Rostocku stał, je Radu za serbske naležnosće Braniborskeje na posedźenju zawčerawšim, wutoru, hišće raz zaběrał. Na marinowym balu bě so rezerwist zwjazkoweho namórnistwa na agresiwne a nacionalistiske wašnje do Uty Henšeloweje dał, kotraž na zarjadowanju serbsku radu Braniborskeje zastupowaše. Předsyda rady Torsten Mak informowaše, zo je so zwjazkowa marina mjeztym wospjet zamołwiła a wobkrućiła, zo njeje potrjecheny wojak uniformy Zwjazkoweje wobory hižo hódny.
Takrjec na městnje teptać dyrbi serbska rada dale w prašenju planowanych nowych kubłanskich směrnicow, kotrež bychu na njedobro serbskeje wučby byli. Hižo kónc minjeneho lěta bě rada ze swojim stejišćom přećiwo planam kubłanskeho ministerstwa protestowała. Kubłanska ministerka Britta Ernst (SPD) je na to změny připowědźiła. „Hač do dźensnišeho njewěmy, kak maja te wupadać“, Torsten Mak kritizuje. Oficialnje rěka: Ručež su změny konkretne, serbsku radu wo tym informuja.
Drježdźany/Budyšin (SN/at). Přihłosuja abo njepřihłosuja delegaća wurjadneho zjězda SPD kónc tydźenja w Bonnje, jednanja z uniju wo nowu wulku koaliciju zahajić? Tež w Budyskim městnym zwjazku strony, tak rjekny jeho předsyda Měrćin Krawc, njejsu jednoho nahlada. „To je normalne tworjenje měnjenja a rozsuda. Njejsmy rozdwojeni. Tendenca pak je skerje přećiwo wulkej koaliciji“, rjekny wón wčera do wuradźowanja zwjazka. Kaž Krawc zdźěli, je zwjazk wčera „z jeničkim přećiwnym hłosom wobzamknył, so přećiwo jednanjam k dalewjedźenju wulkeje koalicije w zwjazku wuprajić“.
Hakle nětko dóšłe oktoberske čisło Praskeho časopisa Česko-lužický věstník ma dwě wobšěrnišej spominani na zemrěteho Kita Lorenca. Předsyda Towarstwa přećelow Serbow Lukáš Novosad mjenuje jeho „najwjetšeho serbskeho basnika druheje połojcy 20. lětstotka“, ale tež „jednoho z najwažnišich přełožowarjow a editorow“. Novosad wustaja, zo je Lorenc tójšto wuznamjenjenjow „poetiskeje přeswědčiwosće dla“ dóstał, zo „w čěšćinje nimo sorabistow so jeho basnjam wěnowachu tak znaći přełožowarjo kaž Jan Skácel a Ludvík Kundera“. Milan Hrabal z Varnsdorfa dopomina so na „mnohe wosobinske zetkanja z Lorencom, kiž je njezapomnity“. K smjerći přećela stwori wón baseń „Básnik se loučí“ („Basnik so rozžohnuje“). Z pjera Kita Lorenca stej wozjewjenej basni „Čas njebě“ (z přełožkom Radeka Čermáka do čěšćiny) a „Melodija“ (přełožk Milan Hrabal). Časopis wozjewi foto zemrěteho a wobraz něhdyšeho młyna we Wuježku.
Twarić pod hołym njebjom je tele dny w gmejnach lědma móžno, dokelž to wjedro prosće njedowola. Hinak je, hdyž móža pod suchim dźěłać, kaž na přikład w nowym Hamorskim zetkawanskim centrumje.
Hamor (AK/SN). Wutworić zetkawanski centrum w twarjenju Wyšeje šule Hamor je tuchwilu najwažniše předewzaće tamnišeje gmejny. Tole podšmórny Hamorski wjesnjanosta Achim Junker (CDU) na zašłym posedźenju gmejnskeje rady. „Po krótkej přestawce wokoło hód a Noweho lěta je twarnišćo takrjec zaso wobsadźene“, wón radźićelam rozłoži. Tójšto rjemjeslnikow wšelakorych branšow je na twarnišću zaso při dźěle.