Aus der aktuellen Ausgabe vom Donnerstag, 18 Januar 2018

Berlin (dpa/SN). Pólska wostanje po słowach amtěrowaceho wonkowneho ministra Sigmara Gabriela (SPD) najebać dwělomne reformy Waršawskeho knježerstwa jedna z najwažnišich partnerkow Němskeje w Europskej uniji. Němsko-pólski poměr je za přichod EU runje tak wažny kaž němsko-francoski. Na to skedźbni Gabriel po zetkanju z nowym pólskim wonkownym ministrom Jacekom Czaputowiczom wčera w Berlinje. Zadźěwać měło so zaćišćej, zo je Europa mjez wuchodom a zapadom dźělena. „Stej-li krajej, kotrejž matej to jako historiski nadawk, stej to cyle wěsće Pólska a Němska“, rjekny Sigmar Gabriel. Zdobom pokaza wón zrozumjenje za pólsku debatu nastupajo reparaciske žadanja na Němsku.

Dejka je za hindu-wosadu wčera w Bremenje twarnišćo za nowy templ pruwowała. „Pola nas je kruwa swjata. Wona je kaž bóh“, wuzběhny wosadny rěčnik Pathmakaran Pathmanathan. Kaž wón rjekny, dyrbješe dejka něhdźe poł hodźiny na ležownosći přebywać. Hdyž so tam derje čuje, je areal dobre městno. Tomu tak bě, budu tam twarić. Wosadźe hinduwow w Bremenje přisłuša po słowach Pathmanathana něhdźe 300 wěriwych swójbow, a za jich kubłanje trjebaja wjac městna.

W portalu eBay poskića předawar zatołkany papjercowy nopašk, z kotrehož je pječa „king rock’n’rolla“ Elvis Presley 1956 rano po koncerće w měsće Tulsa w zwjazkowym staće USA Oklahoma pił. Nopašk je nimo toho signowany. Štyri dny do kónca přesadźowanja steješe najwyši poskitk­ pola 880 dolarow, štož je něhdźe 720 eurow.

Barcelona (dpa/SN). Wotsadźeny katalanski regionalny prezident móhł tež nowy­ być. Najwjetšej stronje Katalon­skeje, kotrejuž zaměr je njewotwisnosć regiona wot Španiskeje, stej so na pod­pěru wo­spjetneje kandidatury Carlesa Puidgemonta za tele zastojnstwo dojednałoj. Wo tym informujetej Puidgemontowa lisćina Junts per Catalunya a lěwicarskonacionalistiska ERC. Zdobom připowědźatej, na prěnim parlamentnym posedźenju hłosować za Rogera Torrenta z ERC. Dotalny měšćanosta katalanskeho městačka měł so z prezidentom parlamenta stać.

Španiski ministerski prezident Mariano Rajoy je hižo póndźelu hrozył, w padźe znowawuzwolenja Puidgemonta nućene zarjadnistwo Katalonskeje podlěšić.

Podstupim (SN/MkWj). Njelubozny po­dawk,­ kotryž bě so w nowembru w Rosto­cku stał, je Radu za serbske naležnosće Braniborskeje na posedźenju za­wčerawšim, wutoru, hišće raz zaběrał. Na marinowym balu bě so rezerwist zwjazkoweho namórnistwa na agresiwne a nacionalistiske wašnje do Uty Henšeloweje dał, kotraž na zarjadowanju serbsku radu Braniborskeje zastupowaše. Předsyda rady Torsten Mak informowaše, zo je so zwjazkowa marina mjeztym wo­spjet zamołwiła a wobkrućiła, zo njeje potrjecheny wojak uniformy Zwjazkoweje wobory hižo hódny.

Takrjec na městnje teptać dyrbi serbska rada dale w prašenju planowanych nowych kubłanskich směrnicow, kotrež bychu na njedobro serbskeje wučby byli. Hižo kónc minjeneho lěta bě rada ze swojim stejišćom přećiwo planam kubłanskeho ministerstwa protestowała. Kubłanska ministerka Britta Ernst (SPD) je na to změny připowědźiła. „Hač do dźensnišeho njewěmy, kak maja te wupadać“, Torsten Mak kritizuje. Oficialnje rěka: Ručež su změny konkretne, serbsku radu wo tym informuja.

Tež w Budyskim městnym zwjazku SPD njejsu jednoho měnjenja

Drježdźany/Budyšin (SN/at). Přihłosuja abo njepřihłosuja delegaća wurjadneho zjězda SPD kónc tydźenja w Bonnje, jednanja z uniju wo nowu wulku koaliciju zahajić? Tež w Budyskim městnym zwjazku strony, tak rjekny jeho předsyda Měrćin Krawc, njejsu jednoho nahlada. „To je normalne tworjenje měnjenja a rozsuda. Njejsmy rozdwojeni. Tendenca pak je skerje přećiwo wulkej koaliciji“, rjekny wón wčera do wuradźowanja zwjazka. Kaž Krawc zdźěli, je zwjazk wčera „z jeničkim přećiwnym hłosom wobzamknył, so přećiwo jednanjam k dalewjedźenju wulkeje koalicije w zwjazku wuprajić“.

Što SPD zhubi, hdyž hłosuje wjetšina delegatow wurjadneho zjězda kónc tydźenja w Bonnje za to, z uniju jednanja za nowu wulku koaliciju zahajić? Wotmołwy móža wšelakore być, jedna pak so hižo do rozsudneho dnja cyle jasnje jewi: Staw strony njebudźe lěpši. Šansy sobuknježenja, wo kotrychž podpěraćeljo kursa šefa SPD Martina Schulza rěča, mnohich w městnych towarstwach prosće njepřeswědča. Woni boja so wo identitu najstaršeje strony w Němskej. Bjez dwěla, swój socialdemokratiski raz je SPD ze zakonjemi Hartza IV kanclera Gerharda Schrödera dospołnje zhubiła. Nětko towaršojo w Budyšinje, we Łužicy, Sakskej kaž po cyłym Zwjazku bolostnje začuwaja: Přesadźa-li so podpěraćeljo wulkeje koalicije na zjězdźe, budźe wobsahowe wobnowjenje SPD na njeznaty čas přestorčene. CDU a CSU byštej so wjeseliłoj, wšako by so SPD zaso raz „zamołwitosće za kraj dla“ popadnyć dała. Axel Arlt

Słodowa fabrika w Großharthauwje ma nětko noweho nawodu: Johannes Unger ze Spytec je zawod přewzał. Tradicija předewzaća, kotraž je so na zhotowjenje słoda (Malz), słodowych ekstraktow a wosebiteje słodoweje muki specializowała, saha hač do lěta 1873. Firma dźěła wot swojeho załoženja jako produkowacy zawod. Po politiskim přewróće 1989/1990 su tam tójšto pjenjez do techniskeho a technologiskeho wobłuka kaž tež do nowych wudźěłkow inwestowali. Foto: Steffen Unger

Hakle nětko dóšłe oktoberske čisło Praskeho časopisa Česko-lužický věstník ma dwě wobšěrnišej spominani na zemrěteho Kita Lorenca. Předsyda Towarstwa přećelow Serbow Lukáš Novosad mjenuje jeho „najwjetšeho serbskeho basnika druheje połojcy 20. lětstotka“, ale tež „jednoho z najwažnišich přełožowarjow a editorow“. Novosad wustaja, zo je Lorenc tójšto wuznamjenjenjow „poetiskeje přeswědčiwosće dla“ dóstał, zo „w čěšćinje nimo sorabistow so jeho basnjam wěnowachu tak znaći přełožowarjo kaž Jan Skácel a Ludvík Kundera“. Milan Hrabal z Varnsdorfa dopomina so na „mnohe wosobinske zetkanja z Lorencom, kiž je njezapomnity“. K smjerći přećela stwori wón baseń „Básnik se loučí“ („Basnik so rozžohnuje“). Z pjera Kita Lorenca stej wozjewjenej basni „Čas njebě“ (z přełožkom Radeka Čermáka do čěšćiny) a „Melodija“ (přełožk Milan Hrabal). Časopis wozjewi foto zemrěteho a wobraz něhdyšeho młyna we Wuježku.

Na najwšelakoriše wašnje přihotuja so dźěći najmjeńšeje skupiny Rownjanskeje Witaj-pěstowarnje „Milenka“ na ptači kwas. Pod gitarowym přewodom Dany Kagelmann wone na přikład ptačokwasny spěw zwučuja. Tón předstaja staršim, dźědam a wowkam 25. januara w 15 hodź. w Slepjanskim Serbskim kulturnym centrumje. Foto: Joachim Rjela

Twarić pod hołym njebjom je tele dny w gmejnach lědma móžno, dokelž to wjedro prosće njedowola. Hinak je, hdyž móža pod suchim dźěłać, kaž na přikład­ w nowym Hamorskim zetkawanskim­ centrumje.

Hamor (AK/SN). Wutworić zetkawanski centrum w twarjenju Wyšeje šule Hamor je tuchwilu najwažniše předewzaće tamnišeje gmejny. Tole podšmórny Hamorski wjesnjanosta Achim Junker (CDU) na zašłym posedźenju gmejnskeje rady. „Po krótkej přestawce wokoło hód a Noweho lěta je twarnišćo takrjec zaso wobsadźene“, wón radźićelam rozłoži. Tójšto rjemjeslnikow wšelakorych branšow je na twarnišću zaso­ při dźěle.