Aus der aktuellen Ausgabe vom Montag, 16 April 2018

Washington (dpa/SN). Bywši šef tajneje słužby FBI James Comey je prezidenta USA Donalda Trumpa w njewšědnje raznej formje nadběhował a jemu wumjetował, zo so za zastojnstwo prezidenta njehodźi. Nimo toho ma Comey za móžne, zo wobsedźi Ruska kompromitowacy material wo Trumpje. Tón bě Comeyja w meji 2017 pušćił. Wot toho časa sej wobaj mjezsobu zjawnje nadawataj. Trump rjekny, zo je Comey „slinowy měšk“. Comey znapřećiwješe w telewizijnej rozmołwje ze sćelakom ABC, zo je Trump wosobina, kotraž wobchadźa ze žonami kaž z kuskom mjasa, kiž stajnje łži a na tym wobsteji, zo ameriski lud tole wěri, moralisce njekmany za zastojnstwo prezidenta.

Bratislava (dpa/SN). Nimale měsacaj po morjenju wotkrywanskeho žurnalista w Słowakskej su znowa dźesaćitysacy přećiwo knježerstwu protestowali. Wjace hač 30 000 ludźi je sej wčera w stolicy Bratislavje dospołne wujasnjenje krawneho njeskutka žadało, kaž powěsćowy portal Dennik.sk rozprawja. K protestam dóńdźe tež we wuchodosłowakskim měsće Humenné. Demonstranća žadachu sej nimo toho wotsadźenje zamołwiteho policajskeho šefa Tibora Gašpara, kotryž po jich měnjenju pytowanje blokuje.

Morjenje inwestigatiwneho žurnalista Jána Kuciaka a jeho slubjeneje Martiny Kušníroveje kónc februara njeje přeco hišće wujasnjene. 27lětnaj buštaj po informacijach policije wotprawjenaj. Kuciak bě styki sobudźěłaćerjow knježerstwa ­k italskej mafiji a k druhim kruham organizowaneho złóstnistwa w Słowakskej přepytował.

Iniciatiwna skupina za Serbski sejm přihotuje wólby

Nowa Łuka (SN/MkWj). Cyłkownje 13 čłonow rady starostow a Iniciatiwy za demokratisce legitimowane ludowe zastupnistwo serbskeho ludu je so minjeny tydźeń w Nowej Łuce, gmejna Halštrowska Hola, schadźowało. Wuradźowachu tam wo dalšim postupowanju hladajo na Serbski sejmik.

Wobnowjenje wotdeleka, z tej zasadu wabi kandidatka za zastojnstwo zwjazkoweje předsydki SPD Simone Lange wo podpěru. Budyscy a łužiscy socialdemokraća Flensburgsku wyšu měšćanostku podpěruja. W rozmołwje z našim wječornikom skedźbnja wona na to, što móže zwjazkowa SPD wot mjeńšin wuknyć. Wědomje konfrontuje so wona ze stronskim aparatom a wšěmi tymi, kotřiž měnja, zo jenož w jich wuskich kruhach prawe personalne namjety zrawja. Čerstwy wětřik wšak němskej socialdemokratiji tyje. To je předsyda Młodych socialistow Kevin Kühnert z akciju přećiwo wospjetnej wulkej koaliciji hižo raz pokazał. Hišće njeje jasne, hač wjetšina delegatow zjězda SPD přichodny kónc tydźenja tajki čerstwy wětřik docyła chce. Hłosujetej-li tam wulkej krajnej zwjazkaj Sewjerorynsko-Westfalskeje a Delnjeje Sakskeje za tamnišu kandidatku Andreju Nahles, nimaja podpěraćeljo Simony Lange scyła šansu. Axel Arlt

Bratislava (SŽ/K/SN). W Słowakskej zhotowjeny film wo Alexanderu Dubčeku je wěnowany politikarjej a statnikej, kiž steješe kónc 1960tych lět na čole reformoweho hibanja w Čěskosłowakskej. Tři wot- rězki w žiwjenju Dubčeka tworja stawiznu filmoweje dramy. Prěni wothrawa so nalěto 1968 za čas euforije a naslědneje okupacije. W tym času bě Dubček w napjatej fyziskej a psychiskej situaciji – podpisać abo njepodpisać Moskowske protokole, z kotrymiž by so wobsadźenje ČSSR přez wójska Waršawskeho zrěčenja legalizowało.

Tel Aviv (dpa/SN). Pjeć bywšich israelskich wótrotřělcow je w zjawnym lisće hladajo na podawki na mjezy ke Gazaskemu pasmu zwurazniło, zo čuja so „wohańbjeni a zrudni“. Čłonojo israelskeje organizacije Breaking the Silence (Mjelčenje přewinyć) w lisće kritizuja, zo „wojerske přikazy wótrotřělcam dowoleja z wótrej municiju na njewobrónjenych demonstrantow třěleć“. Woni začuwaja „hańbu hladajo na njemoraliske přikazy a zrudobu wo młodych wojakow. Woni sceny nihdy njezabudu, kotrež su přez dalokowidy swojich bróni widźeli“, w lisće rěka. „Wótrotřělcam kazać njewobrónjenych demonstrantow zatřělić, kotřiž nikoho smjertnje njewohrožeja, je dalši wuslědk wobsadnistwa a wojerskeje mocy nad milionami Palestinjanow“, pisaja bywši wótrotřělcy w lisće, kotryž su ze swojim mjenom podpisali.

Wot kónca měrca je na masowych protestach na mjezy mjez Gazaskim pasmom a Israelom 34 Palestinjanow žiwjenje přisadźiło. Israel wumjetowanja, zo přećiwo protestowacym přeraznje postupuje, wotpokazuje. Pječa smědźa wojacy jenož na nohi demonstrantow třěleć.

W Budyskim NSLDź je sej minjenu sobotu 9 760 ludźi w předpředani zastupny lisćik za lětuše 23. lětnje dźiwadło kupiło. Z tym je hižo něhdźe štwórćina wšěch městnow preč. Cyłkownje je wot 14. junija (premjera) do 22. julija 35 předstajenjow třećeho dźěla Olsenoweje cwólby na Budyskim hrodźe planowanych. Kaž z dźiwadła rěka, pytaja hišće muskich komparsow. Pod režiju intendanta NSLDź Lutza Hillmanna, wuhotowanjom Mirosława Nowotneho a Olafa Haisy, Istvána Kobjele, Rainera Grußa kaž tež Katje Reimann we hłownych rólach bě jebarska komedija w zašłymaj lětomaj wulki wuspěch. Foto: Uwe Soeder

Prěni króć wotmě so wčera we Wochožanskim parku błudźenkow němsko-pólski nalětni swjedźeń. Mnozy běchu sej při rjanym słónčnym wjedrje z kolesom na swójbne zarjadowanje dojěli.

Wochozy (FAG/SN). „Što so pola našich susodow stawa?“ Tute prašenje steješe w srjedźišću prěnjeho dnja susodow, na kotrymž so wuměłcy, zahrodnikarjo, hosćencarjo a wuhotowarjo parkow z Němskeje a Pólskeje wčera wot 11 do 17 hodź. we Wochožanskim parku błudźenkow zetkachu. Předsyda towarstwa daloko znateho a přewšo woblubowaneho areala Ulrich Klinkert a Klaus Tschöke z jednaćelstwa ze swojimi sobudźěłaćerjemi k startej do nalěća přeprosyštaj. Přistajeni parka błudźenkow kaž tež klóšterskeje zahrody z Pančic-Kukowa sta hosćom tež z Pólskeje wo swojim skutkowanju rozprawjachu. We wopytowarskim centrumje parki a zahrody mjezynarodneje „zahrodoweje kulturneje šćežki wobeju stron Nysy“ předstajichu. Rady stej zahrodnikarce Simone Dietrich a Anita Schwitalla hosći po pućikach cyłkownje 20 hektarow wulkeho parka wodźiłoj.

Gmejna jeno zdźěla na loni přizjewjene njedostatki reagowała

Koslow/Njeswačidło (JK/SN). Znowa běchu Koslowčenjo na posedźenje Njeswačanskeje gmejnskeje rady přišli, zo bychu hišće raz na hižo dlěši čas znate njedostatki we wsy skedźbnili. Zdobom wočakowachu stejišćo wjesnjanosty kaž tež radźićelow k stawej wobdźěłanja hižo loni naspomnjenych problemow.

Muža pytali a namakali

Budyšin. 87lětny muž je so sobotu po připołdnju z Budyskeje starownje na Słonoboršćanskim puću zhubił. Po wobjedźe běchu tam zwěsćili, zo muž hižo w swojej stwě a tež nihdźe druhdźe w domje njebě. Kaž stajnje w tajkich padach započachu wjacore wobsadki policajskich awtow za rentnarjom pytać. Jich podpěrowaštej wosebje wukubłany psyk Zhorjelskeje policajskeje direkcije a policajski helikopter z Lipska. Ale zasadźenje štyrinohaća kaž tež „wóčko z powětra“ njewjedźeštej k tomu, staršeho muža namakać. Hakle na pózdnim wječoru móžachu zasadźeni zastojnicy kaž tež sobudźěłaćerjo w starowni wodychnyć. Wobsadka policajskeho jězdźidła wuhlada 87lětneho w Budyskej Strowotnej studni a móžeše jeho stroweho w hladarni wotedać.