Aus der aktuellen Ausgabe vom Dienstag, 19 Februar 2019

Drježdźany (dpa/SN). Podhlada wopačneje přisahi dla wobskoržena bywša předsydka strony AfD Frauke Petry chce w procesu najprjedy raz mjelčeć. To zdźěli wčera jeje prawiznik Carsten Brunzel na zahajenju jednanja před Drježdźanskim krajnym sudnistwom. Petry wumjetuja, zo je w nowembru 2015 před wólbnym přepytowanskim wuběrkom wopačne informacije dawała.

Mandźelski 43lětneje, europski zapósłanc Marcus Pretzell, bu na zahajenju procesa jako jeje zastupnik akceptowany a smě za čas jednanja pódla njeje sedźeć.

Hnydom na spočatku jednanja prošeše prawiznik Petry wo prawnisku rozmołwu. Tale forma wuswětlenja hodźała so jeno zjawnje přewjesć, sudnistwo wujasni. Toho pak so Brunzel wzda.

Jako prěni swědk bu zastojnik sakskeho kriminalneho zarjada słyšany, kiž bě pad přepytował. Tež předsydu wólbneho přepytowanskeho wuběrka Marka Šimana (CDU) a sakskeho kultusoweho ministra Christiana Piwarza (CDU) su na wčerawše jednanje jako swědkow přeprosyli.

Wokrjesna lutowarnja zhladuje na dobre hospodarske lěto

Budyšin (SN/BŠe). Wokrjesna lutowarnja Budyšin ma wobstajnje nowe wužadanja zmištrować. Nimale dźesać lět hižo traje doba niskich danjow. Za klientow čujomny bě nowy datowy škit. „Zo je so wuslědk danjow pjenježneje politiki Europskeje centralneje banki pomjeńšił, smy wočakowali. Tohodla smy ze zawodnym wuslědkom 4,3 milionow eurow spokojom“, zdźěli nawoda předsydstwa Budyskeje wokrjesneje lutowarnje Dirk Albers. Hladajo na ćežke wiki je so pjenježnemu institutej poradźiło filialnu syć wobchować, štož sej klienća jara wažna. Mjeztym maja wšitke filiale moderne wuhotowanje z internetnym přistupom WLANom.

Diskusija, Serbski dom wužiwać a jón jako towarstwowy dom zachować, dale dźe. Jasne słowa je direktor Załožby za serbski lud Jan Budar na njedawnym wuradźowanju Zwjazkoweho předsydstwa Domowiny rjekł. Tež ja so prašam, kotre serbske towarstwo dom scyła wužiwa? Mnozy jón jako zetkawanišćo zańč nimaja a radšo do korčmy du. Wězo móhli kritikarjo rjec, zo tam telko městna njeje a „sterilne běłe sćěny“ žurle runjewon k přebywanju njepřeprošeja. Tola žiwjenje w Serbskim domje mamy sami zamołwić. Što pak činimy jako čłonojo towarstwow, zo bychmy dom jako srjedźišćo serbskich cyłkow zachowali? Diskusiju hižo dołho wjedźemy. Jeničcy, kotrejž dom prawidłownje ze žiwjenjom wupjelnjatej, stej Serbska kulturna informacija z wustajeńcami a Spěchowanski kruh za serbsku ludowu kulturu ze wšel­kimi přehladkami a jutrownymi wikami. A hdźe su tamne serbske towarstwa, na čole­ Maćica Serbska? Janek Wowčer

Berlin (dpa/SN). Do wólbow krajnych sejmow na wuchodźe Němskeje a do europskich wólbow je diskusija wo wólbnobojowych wustupach zwjazkoweje kanclerki Angele Merkel (CDU) wudyriła. Šef CDU w Durinskej Mike Mohring je za to, zo so Merkel do wólbnych bojow zawjaza. „By hłupe było CDU-kanclerku před ludnosću chować“, wón podšmórny.

Přiwšěm je tež dosć skeptiskich hłosow. „Wustup zwjazkoweje kanclerki njebudźe nam w pomhać“, wuzběhny prezident Sakskeho krajneho sejma Matthias Rößler (CDU). Braniborski šef CDU Ingo Senftleben widźi to trochu hinak, a nadźija so podpěry zwjazkoweje politiki.

Mjeztym zaběra so strona z organizaciju europskich wólbow. Hižo 25. měrca chcetej gremijej CDU a CSU zhromadny wólbny program wobzamknyć. Zhromadny start boja za europske wólby 26. meje je kónc apryla. Hakle po meji chcedźa so zamołwići z wólbami krajnych sejmow w Durinskej, Sakskej a Braniborskej zaběrać. Překwapjenka budźe, koho drje bóle do wólbneho boja zawjazaja, předsydku CDU Annegret Kramp-Karrenbauer abo Angelu Merkel.

W Choćebuzu-Depsku su njedźelu 135. zapust swjećili. K dujerskej hudźbje skupiny nAund je nimo štyrjoch dźěćacych 80 młódšich a staršich porow po wsy ćahnyło. Na sydom stacijach wone pozastachu a dźakowachu so wobydlerjam za podpěru. Hižo sobotu tydźenja běchu tam camprowali a so dźeń po tym k zhromadnym rejam­ w stanje při sportnišću zetkali. Ze zapustom zakónčeja w Delnjej Łužicy zymske dźěła. Nałožk je jedyn z najznaćišich a wjeršk na mnohich wsach. Zdobom je to jedna z mało móžnosćow holcam a žonam, swjedźensku narodnu drastu so zhotować. Foto: Michael Helbig

Praha (ČŽ/K/SN). Kak Češa hospodarski niwow swojeho kraja hódnoća a kajki jón k tomu widźa w dźewjeć dalšich europskich statach, za tym je so zwěsćowarnja zjawneho měnjenja CVVM wobhonjała. Wuslědk wujewja, zo 78 procentow woprašanych ekonomiski staw Čěskeje jako dobry posudźuje, 20 procentow je nawopačneho měnjenja. To je po lěće 1997 najwyše pozitiwne hódnoćenje hospodarstwa a runočasnje najniše negatiwne. Swój čas bě poměr 26 proc. pozitiwnych měnjenjow, ale 73 proc. negatiwnych. Lěta 2010 posudźi 34 proc. situaciju pozitiwnje a 64 proc. negatiwnje.

CVVM je zdobom zajimowało, kak widźa wobydlerjo staw hospodarstwa w dalšich dźewjeć krajach. Najwyši niwow wuswědčeja respondenća při tym ze 94 procentami Němskej, z 92 proc. sćěhuje Awstriska­ před Čěskej z 78 proc. Za njej zaměstnja so ze 66 proc. Słowakska. Pólska zaběra z 62 proc. pjatu poziciju, Madźarska­ ma ze 57 proc. šeste, Słowjenska z 52 proc. sedme a Ruska z 45 proc. wosme městno. Najšpatnišo wobstejitej Bołharska z 25 a Rumunska z jeničce 13 procentami.

Pjerjodrěće słuša k tradicijam, kotrež na Rownjanskim Njepilic statoku kóžde lěto pěstuja. Wčera a dźensa je so tam stajnje něhdźe­ 30 žonow zetkało a so tomule sporemu dźěłu wěnowało. Rudi Krawc a Günter Hoffmann (wotlěwa) staj dokładnje 800 gramow nadrěteho pjerja za hłowak a 1 400 gramow za poslešćo wotwažiłoj. Foto: Joachim Rjela

Je drje lědma gmejny abo města, hdźež žanu wučbnu šćežku nimaja. Dlěše abo krótše so wone najwšelakorišim temam­ wěnuja. W Njeswačidle móhli nětko dalšu tajku wutworić.

Njeswačidło (JK/SN). Wučbnu šćežku wo lodowej dobje chcetej Njeswačanska přirodoškitna stacija a tamniše towarstwo přećelow kultury a domizny zhromadnje připrawić. Nastork k tomu dało je 33 błudźenkow, kotrež leža při puću do směra na Koslow, kotrež pak najskerje lědma něchtó na wědomje bjerje, abo ludźo njewědźa, čehodla wone tam scyła su. Tak měještej stacija kaž tež towarstwo spomóžnu ideju, kamjenje integrować do wučbneje šćežki a wutworić zajimawy wotrězk wuwića zemje.

Hamorska gmejnska rada stategijowy koncept turizm 2025 schwaliła

Hamor (AK/SN). Bjerwałdski jězor chce gmejna Hamor jako jeho najwažniši akter­ turistisce dale wuwiwać. Zažnu a pózdnju sezonu kaž tež přenocowanski turizm chcedźa sylnišo wožiwić, a to wšo pod třěšnej značku łužiskeje jězoriny. To je zaměr strategijoweho koncepta za turizm při Bjerwałdskim jězoru 2025, kotryž su Hamorscy gmejnscy radźićeljo na swojim zašłym posedźenju schwalili. „Dźe wo to, infrastrukturu dale polěpšić, štož je dołhodobny, byrnjež dobrowólny nadawk“, rjekny turistiski poradźowar gmejny Matthias Wedepohl.

Paduši w bydlenju byli

Budyšin. Jednoswójbny dom na Budyskej Dieselowej běchu sej paduši minjeny kónc tydźenja jako cil wupytali. W času wot pjatka ranja hač do njedźele wječora so woni tam zadobychu a wšitke rumnosće přepytachu. Pokradnyli su třicyfrowu sumu pjenjez. Nimo toho načinichu ně­hdźe 2 000 eurow wěcneje škody. Kriminalisća zawostajene slědy zawěsćichu.

Zastojnikam hrozył

Wojerecy. 19lětny młodostny je zawčerawšim policiju we Wojerecach zaběrał. Wokoło připołdnja bě wón z čornej barbu něšto na sćěnu twarjenja při Łužiskim naměsće pryskał. Pozdźišo wobydlerjo samsneho muža dla policiju znowa wołachu, jako je při hrajkanišću na Hasy měra hewrjekał a ludźi wohrožował. Dokelž 19lětny tež policajskim zastojnikam hrožeše, wzachu jeho sobu na Wojerowski rewěr.