Aus der aktuellen Ausgabe vom Mittwoch, 26 Juni 2019

Ewaluaciska rozprawa załožby Sakske wopomnišća nětko předleži

Drježdźany/Budyšin (UM/SN). Ewaluacija załožby Sakske wopomnišća, kotruž je institut Prognos přewjedł, je wotzamknjena. „Kónčna rozprawa wopřijima pozitiwne hódnoćenja runje tak kaž pokiwy k dalewuwiću załožby“, rozłožuje předsydka rady mjenowaneje załožby a mi­nisterka za wuměłstwo a wědomosć dr. Eva-Maria Stange (SPD). Hižo w dwój­nym etaće 2019/2020 Swobodneho stata Sakskeje su załožbje srědki přewostajene. Tak stupaja přiražki wot 2,45 milionow eurow na stajnje 3,046 milionow lětsa a klětu. To zmóžnja wjetše wudawki za personal, ale tež za wěcne zarjadniske nadawki, za srědki třećim kaž tohorunja za inwesticije.

Zo so jednostronska lubosć zwjetša nje­spjelnja, dyrbješe 33lětna žona w Mnichowje nazhonić. Před dwěmaj lětomaj bě so na dowolu do muža zalubowała a je jeho wot toho časa zas a zaso přesćěhała. Byrnjež jej 43lětny wjackróć – samo sudnisce –, kontakt zakazał, je so wona w nocy na minjenu sobotu do jeho by­dlenja zadobyła a kruće spjaceho žadosćiwje hubkowała. Wotućiwši wón hnydom policiju­ zawoła, a ta 33lětnu na městnje zaja.

Wo rozhorjenje postarał je so muž w Hemerskej kupnicy, hdźež so we wotdźělu chłódźakow dospołnje nahi zeslěka. Jako předawarka zakroči, bě so 32lětny cholowy na zbožo zaso wobuł. Prjedy hač móžeše jeho zadźeržeć, wón twochny a hrabny sej spěšnje hišće tyzu piwa z regala a we wotdźělu za sad bananu. Hač bě so muž přewysokich temperaturow dla zeslěkał, dotal jasne njeje.

Mawt w Němskej žana njepřińdźe. To je nam zwjazkowa kanclerka Angela Merkel do wólbow zwjazkoweho sejma 2017 přilubiła, a tomu tež tak budźe. Přiwšěm je koaliciski partner hižo raz prestižny projekt CSU ze zwjazkowym wobchadnym ministrom, najprjedy Alexanderom Dobrindtom a po nim Andreasom Scheuerom, zahajił. Mjeztym je Zwjazk za na­dróžny popłatk hižo wjac hač 50 milionow eurow płaćił, kaž su wčera wozjewili. Ani jenički cent pak njebudźe po wukazu Europskeho sudnistwa zarunany. Ně, projekt nadróžneho popłatka móhł so samo hišće podróšić, dokelž běštej zrěčeni z wobhospodarjerjomaj hižo wotzamknjenej. To so tola prašam, kak je tajke něšto móžno. Wšako bě ministrej wědome, zo njeje hišće ničo rozsudźene. Za mnje je to jednorje prajene znjewužiwanje dawkowych srědkow. W hospodarskim přede­wzaću je tajke jednanje přičina wupowědźenja. Z cuzymi pjenjezami takle wobchadźeć je njezamołwite. Bianka Šeferowa

Freiburg/Offenbach (dpa/SN). Kaž na ekstremnu horcotu mamy so tele dny tež na jara wulke UV-promjenjenje nastajić. Je-li woboje nadměrnje wulke, móže to za čłowjekow chětro strašne być. W nimale wšitkich zwjazkowych krajach je UV-promjenjenje wot dźensnišeho ze stopnjom „jara wulke“ woznamjenjene. Swětowa strowotniska organizacija tuž radźi w času wot 11 do 15 hodź. pod hołym njebjom njepřebywać. Nimo toho měli ludźo słónčne nawoči, kłobuk a słónčnu kremu wužiwać.

Praha (ČŽ/K/SN). Dohromady 1 042 bilionow krónow (něhdźe 46 miliardow eurow) su financne instancy Čěskeje loni z najwšelakorišich dawkow nazběrali. Porno lětu 2017 bě to přirost wo dobrych 62 miliardow krónow (ca. 2,4 miliardy eurow). Suma 727 miliardow krónow dźěše do statneho budgeta, 195 miliardow krónow na jednotliwe wobwody a komuny a přibližnje 20 miliardow krónow do statneho fondsa wobchadneje infrastruktury.

Z bilancy, kotruž je knježerstwo parlamentej podało, tež wuchadźa, zo bě nadhódnotowy dawk statej najwyše šerpatko wunjesł, mjenujcy nic mjenje hač 413 miliardow krónow. Šćedriwiše pjenježne „žně“ wo dźesatki miliardow krónow porno 2017 su po hódnoćenju knježerstwa wuslědk rósta hospodarstwa. Wot dźěławych je stat wjac hač 193 miliardow krónow nazběrał. Dochody z přetrjebarskeho dawka su 167,4 miliardy krónow wučinjeli, štož je porno lětu 2017 přibytk wo 4,7 miliardow krónow. Přetrjebarski dawk na bencin a dalše ćěriwa samy je při tym wjace hač 90 miliardow krónow do statneje pokładnje zmjetł.

Na baletnej žurli Serbskeho ludoweho ansambla zwučuja rejwarki a rejwarjo tuchwilu za program „Argentinske nocy“. Pjatk a sobotu jón zhromadnje z orchestrom a chórom SLA we wobłuku 15. hudźbneho swjedźenja towarstwa Via regia – hudźbne eventy na dworje Domu biskopa Bena w Smochćicach předstaja. Spěwarjow podpěruje 30 lajkow, organizowanych w projektnym chórje. Wo prawy južnoameriski flair postaraja so hóstni hudźbnicy Orquesta Municipal de Tango Ciudad de La Plata kaž tež štyrjo argentinscy rejwarjo pod nawodom Celije Milan (srjedźa), kotraž je za cyłkownu­ choreografiju zamołwita. Foto: SN/Hanka Šěnec

Berlin (dpa/SN). Zwrěšćeny nadróžny popłatk za wosobowe awta je Zwjazk hižo 53,6 milionow eurow płaćił. To wuchadźa z rozprawy wobchadneho ministerstwa zwjazkowemu sejmej. Rozprawa tež němskej powěsćerni dpa předleži. Minjeny tydźeń je Europske sudnistwo w Luxemburgu mawt za njezakonsku deklarowało, dokelž by šoferam z wukraja njelěpšiny wunjesła. Němskim šoferam chcychu popłatk přez niše dawki zaso wróćić. Wukrajni šoferojo bychu jenož na awtodróhach mawt płaćić dyrbjeli.

Tuchwilne njewšědnje horce wjedro mnohich ludźi poćežuje. Štóž pak ma doma něšto drobneho skotu a trjeba w zymje nimo syna tež wotawu, tón tele dny wužiwa a nětko druhi raz swoje składy napjelnja. Wčera pozastachmy pola Wićazec w Šunowje, kotřiž runje wotawu dźěłachu. Foto: SN/Maćij Bulank

Pančicy-Kukow (SN/MWj). W běrowowym twarjenju zarjadniskeho zwjazka Při Klóšterskej wodźe w Pančicach-Kukowje su nětko w poslednjej horcej fazy přihotow na energetiske saněrowanje domu. Z nim chcedźa po wšěm zdaću spočatk awgusta započeć. Na wčerawšim poslednim posedźenju zastupjerjow pjeć sobustawskich gmejnow nachilaceje so wólbneje doby přepodachu twarskim firmam prěnje nadawki. To su hłownje te, kotrež dyrbja jako prěnje zwoprawdźić.

Štóž runje dowol nima, tón ma tele dny chětro horce wjedro znjesć. Hač w běrowje, nakładnym awće abo na twarnišću – čłowjek so lědma wjeseli, hdyž je hižo dopołdnja 30 stopnjow a wjace.

Rakecy (aha/SN). Horcoće wosebje wustajeni su twarscy dźěłaćerjo, kotřiž maja nimo toho hišće ćežke ćělne dźěło zmištrować. Dźěłaćerjo Hórčanskeje Weh­nertec firmy mějachu předwidźane, parkowanišćo před Rakečanskim nakupowanišćom asfaltować. To pak při tuchwilnych temperaturach móžno njeje. Tohodla so najprjedy hinašim hłuboko­twarskim dźěłam wěnuja, kaž nawoda zawoda Ronald Thote rozłoži. Po jeho słowach smědźa dźěłaćerjo hižo připoł­dnju dźěłać přestać a nadhodźiny brać.

Kulowski ćěsla Milan Šefer swojim dźěłaćerjam do transportera kašćik wody staji, prjedy hač na twarnišća wotjědu. Woni drje su jara rozdźělne wjedro zwučeni, přiwšěm spytaja na třěchach nic runje tam dźěłać, hdźež so słónco staja.