Zrudna powěsć je k nam dóšła, zo je něhdyša županka našeje župy „Michał Hórnik“ Trudla Kuringowa 84lětna na prawdu Božu wotešła. Narodźiła bě so 28. januara 1940 do serbskeje swójby w Kanecach. Wuchodźiwši šulu we Wotrowje a susodnych Pančicach kaž tež po wopyće wyšeje šule w Budyšinje nawukny powołanje tekstilneje chemikarki. Přemóžaca pak bě jeje žadosć, stać so z wučerku. Tuž nawróći so po dwěmaj lětomaj z Limbacha-Oberfrohny do Łužicy, zo by na Budyskim Pedagogiskim instituće serbšćinu a němčinu studowała. Wot 1968 do 1991 běše wona wučerka w Šuli Ćišinskeho w Pančicach-Kukowje. Mjeztym zabsolwowa dalokostudij chemije. Dalši puć powołanskeho žiwjenja wjedźeše ju jako wučerku na Budyski Serbski gymnazij hač do lěta 2000.

Zmandźeliwši so z Janom Pohončom, narodźi so mandźelskimaj w přichodnych lětach pjeć dźěći. Ćežke horjo je swójbu trjechiło, jako mandźelski a nan 1991 zemrě.

Trudla Kuringowa bě hižo z časa swojeje młodosće aktiwna čłonka Domowiny. Nimale 50 lět skutkowaše w předsydstwje Domowinskeje skupiny w Kanecach, wjacore lěta z toho jako předsydka.