Najwjetša župa hotuje so na swoju hłownu zhromadźiznu

Choćebuz (SN/mb). Dr. Pětš Šurman chce klětu znowa jako župan kandidować. Zo je wón zwólniwy, zastojnstwo dale wukonjeć, je tež signal potencielnym kandidatam za župne předsydstwo, z nim hromadźe na dobro serbskeho ludu w Delnjej Łužicy skutkować. Na wčerawšim posedźenju gremija su hłownu zhromadźiznu najwjetšeje župy přihotowali, kotrejž 2 600 čłonow přisłuša. Hdyž budu so jeje zastupjerjo klětu 28. februara w Žylowje schadźować, chcedźa so nimo wólbow tež temam wěnować, kotrež njech­ towarstwa a skupiny zapodadźa.

Pruwowali su zamołwići župy, kak wobchadźeć z ekstremistiskimi politiskimi pozicijemi. Zwjazkowe předsydstwo Domowiny bě lětsa wobzamknyło, zo so kóždy, kotryž na přikład za AfD kandiduje, z tym awtomatisce z gremijow třěšneho zwjazka wuzamknje. W Delnjej Łužicy budu delegatam župneje hłowneje zhromadźizny hinaši puć namjetować, kaž nam župan wobkrući: Rozsudne njech je, štož Serb, kotryž so w „módrej stronje“ angažuje, konkretnje čini a praji.