Ruska w Syriskej rakety nastajiła
Moskwa (dpa/SN). Ruska je na swojim zepěranišću Tartus w Syriskej moderny raketywotwobaranski system S-300 nastajiła. „Kompleks ma zepěranišćo wójnskeje mariny kaž tež łódźe před pobrjohom škitać“, rjekny generalny major Igor Konašenkow w Moskwje. System nikoho njewohroža, dokelž je ryzy zakitowanski. Nimo toho je Ruska hižo lětadławotwobaranske rakety S-400 nastajiła, Konašenkow w tym zwisku praji.
Najebać přetorhnjene měrowe jednanja z USA chce so Ruska w Syriskej dale angažować, kaž rěčnik Krjemla Dmitrij Pjeskow potwjerdźi. „Kónc rozmołwow połoženje wězo chětro poćežuje. To pak njerěka, zo syriske wójsko wjace njepodpěrujemy“, Pjeskow po informacijach powěsćernje Tass rjekny. Ruske knježerstwo kónc bilateralnych rozmołwow wo přiměrje w Syriskej wuraznje wobžaruje. Přiwšěm njeje połoženje dramatiske. Mjez zastupnikami wójskow wobeju krajow kontakty dale wobsteja, zo njeby při wojerskich akcijach w Syriskej ke konfliktam mjez USA a Ruskej dóšło.
To a tamne (06.10.16)
Nowoseelandski rugbyjowy profi Aaron Smith je sej sam hrajnu přestawku nanuzował. Wón bu suspendowany, dokelž bě so na lětanišću w nowoseelandskim Christchurchu njediskretnje ze žonu zabawjał, a to na nuzniku za zbrašenych. Naležnosć njeby za profija sćěwki měła, njeby-li swójbny nan, kiž bě ze sydom dźěćimi w bliskosći, wšitko wobkedźbował a so pisomnje hóršił.
Na Erfurtskim hłownym dwórnišću je mać swojej dźěsći scomt kóframi prosće zabyła. Sobudźěłaćerce železnicy stej třilětna holčka a pjećlětny hólc wutoru wječor we wosmich napadnyłoj, dokelž běštej cyle samaj z wačokami na nastupišću. Krótko do toho bě tam ćah do směra na Lipsk wotjěł. W nim mać dźěsći sedźeše. Wona so wězo hnydom zaso do Erfurta wróći, zo by holčku, hólca a kófry wotewzała.
Polan primas benediktinow
Rom (B/SN). Abt Gregory Polan z USA je nowy abtowy primas benediktinow. 250 abtow wuzwoli Polana z abtaje Conception (zwjazkowy stat Missouri) w Romje za naslědnika Němca Notkera Wolfa, kiž bě zastojnstwo po 16 lětach złožił. Primas je najwyši reprezentant wšěch 22 000 benediktinow a benediktinjankow swěta.
Katolska kritika na CSU
Bonn (B/SN). Wjacori zastupjerjo katolskeje cyrkwje kritizuja namjety CSU za wótrišu migracisku politiku. Prezident Centralneho komiteja němskich katolikow Thomas Sternberg (CDU), prowincialny wyši pater němskich jezuitow Stefan Kiechle kaž tež Kölnjanski arcybiskop kardinal Rainer Maria Woelki warnowachu před njefachowym zjednorjenjom, štož předsudki a strachi rozpłomjenja.
Patriarchaj so zjednałoj
Resursowy dom
Rozsud Ceta dla přestorčeny
Berlin (dpa/SN). Zwjazkowe knježerstwo njeje so na swojim dźensnišim posedźenju, kaž bě planowane, z dwělomnym wikowanskim zrěčenjom mjez Europskej uniju a Kanadu (Ceta) zaběrało, pječa formelnych přičin dla. Poprawom chcychu zwjazkowemu ministrej za hospodarstwo Sigmarej Gabrielej (SPD) połnomóc spožčić, zo by zrěčenju w ministerskej radźe Europskeje rady přihłosował. Chcedźa z Kanadu hišće raz wo tym jednać.
Rozsudźa wo koaliciji
Berlin (dpa/SN). Jako posledni ze wšitkich třoch wobdźělenych politiskich stron chcedźa Berlinscy Zeleni dźensa wječor rozsudźić, hač z SPD a Lěwicu wo wutworjenju zhromadneho koaliciskeho knježerstwa jednaja. Za to zeńdźe so z 50 wosobow wobstejacy krajny wuběrk. SPD a Lěwica stej hižo přihłosowałoj. Rozmołwy móhli so jutře zahajić.
Sakska koalicija stabilna
Zwjazkowy prezident Joachim Gauck (naprawo) a jeho partnerka Daniela ...
Afghanjanow wróćo pósłać?
Dočasnje wozjewjeny dokument EU zbudźa rozhorjenje
Brüssel (dpa/K/SN). Mjezynarodna konferenca dawarjow Afghanistanej je dźensa w rozsudnej fazy. Zastupnicy 70 krajow pjelnja při tym paket podpěry za kraj pod Hindukushom. Po wšelkich žórłach ma wón podobny niwow měć kaž dotalny paket, po kotrymž je Afghanistan w štyrjoch lětach něhdźe 16 miliardow dolarow dóstał.
Njemału zadźiwanosć zbudźi dokument, kotryž bě so wčera wječor njenadźicy online jewił. Z njeho wuchadźa, zo změja so staty Europskeje unije přichodnje wo wjele jednorišo, próstwarjow wo azyl z Afghanistana do domizny wróćo pósłać. Tak Kabulske knježerstwo mjez druhim připraja, pućowanske dokumenty spěšnišo wustajeć. Zdobom chce pruwować natwar specialneho terminala za přijimanske lěty wupokazanych.
Mjeztym je jasne, zo bu dokument hižo minjeny kónc tydźenja podpisany, EU pak njeje jeho wozjewjenje hišće dowoliła. Z tym zo je jón tež Kabulske knježerstwo signowało, spjelnja Afghanistan po sudźenju diplomatow trěbne wuměnjenja za pomocny paket EU.
Na wopyće wojakow
Ciwilisća morjeni
To a tamne (05.10.16)
102 lěće staru žonu zajeli su policisća w staće USA Missouri, štož bě sej wona wuraznje přała. Ze zajećom su jej zastojnicy w St. Luisu wjelelětny són spjelnili, kaž na Facebooku pisaja. Woni dowjezechu Edie Simms ze sputanymaj rukomaj w policajskim awće do hladarnje, kotrejž staruška prawidłownje pjenjezy daruje. Akcija so 102lětnej widźomnje spodobaše, kaž wona sćelakej Fox rozprawješe, „předewšěm te ručne puta“.
Přihotowanje rězkow k praženju je w Alsdorfje pola Aachena zasadźenje policije zawiniło. Wobydlerka wjaceswójbneho domu bě w připołdnišich hodźinach policiju wołała a so twarskich dźěłow pola susoda dla hóršiła. Zastojnicy wěcku spěšnje wujasnichu. Swójba bě šnicle klepała. „Rězki so w pónoji praža. Žana naprawa. Nětko knježi měr“, w policajskej rozprawje rěka.
