Budyšin (SN/MkWj). Přihoty wažneho twarskeho projekta, nowotwara železniskeho mosta nad Budyskej Zeppelinowej, so nachileja. Wo tym je serbski zapósłanc CDU w Sakskim krajnym sejmje Marko Šiman nowinarjow dźensa informował. Planowanske podłožki bě Němska že­leznica jako hłowna zamołwita minjeny čas Zwjazkowemu železniskemu zarjadej k pruwowanju přepodała. Wottam ma Marko Šiman­ po swójskich wuprajenjach informacije, zo je „signal bórze zeleny“. Ručež změja twarsku dowolnosć přizwolenu, chcedźa podłožki dwaj tydźenjej zjawnje wupołožić, štož drje so hišće w prěnim połlěće stanje, Šiman rjekny. Nazymu potom móhli twarić započeć. Po słowach Šimana je to dotal sobu najwažniši infrastrukturny twarski projekt. Dźěła maja so tak zrjadować, zo budźe poćežowanje za firmy a wobydlerjow w tutej kónčinje znjesliwe.

Mysteriozneho paducha całtow je policija w Sewjerorynsko-Westfalskej wuslědźiła, byrnjež jeho njedosahnyła. Jedna so wo rapaka, štož fota dokumentuja. Muž z Aachena bě so na policiju wobroćił, dokelž běchu so dny dołho całty při durjach zhubjeli. Ta da so do dźěła a nastaji kamery. Wobrazy pokazuja, kak je čorny ptak wušiknje titu wočinił a jednu całtu po druhej spakosćił. Z kóždej całtu je ekstra do swojeho schowa lećał. Jeho přesćěhać bě bjez zmysła.

Bombowy alarm zawiniła je dźěćaca kniha w Berlinskim Domje němskeho hospodarstwa. Twarjenje, w kotrymž maja wodźace gremije hospodarstwa swoje běrowy, dyrbjachu wčera kompletnje ewakuować, zo bychu fachowcy podhladny pakćik přepytowali. W nim bě dźěćaca kniha z bateriju a wótřerěčakom, kotraž čłowječe a zwěrjace hłosy napodobnja.

Deveselu (dpa/SN). Najebać protesty Ruskeje NATO syć raketywotwobaranskich stacijow dale wutwarja. Dźensa su w rumunskim Deveselu w přitomnosći ge­neralneho sekretara NATO Jensa Stol­tenberga nowu staciju přepodali. Dalšu chcedźa jutře na sewjeru Pólskeje twarić započeć. Ruska wojerskemu zwjazkej wumjetuje, zo ze stacijemi strategisku a nuklearnu runowahu w regionje myli. Stoltenberg pak dźensa hišće raz potwjerdźi, zo njeměrja so rakety přećiwo Ruskej

Müller: Přilubjenja dodźeržeć

Berlin (dpa/SN). Zwjazkowy minister za wuwiće­ Gerd Müller (CDU) mjezynarodne zjednoćenstwo statow namołwja, přilubjene pomocne srědki za wopory wobydlerskeje wójny w Syriskej spěšnje wupłaćić­. Najpozdźišo na wjeršku UNO k humanitarnej pomocy 24. meje w Turkowskej měli pjenjezy „na blidźe być“, rjekny Müller dźensa w zwjazkowym sejmje. Na Londonskim zetkanju w fe­bruaru běchu kraje wjace hač dźewjeć miliardow eurow pomocy přilubili.

Prezidentka wotsadźena

Sta ludźi su so dźensa z bayerskeho Regensburga na najdlěše pěši putniko­wanje Němskeje do 111 kilometrow zdaleneho Altöttinga nastajili. Hač do soboty chcedźa čaru zmištrować. Kilometry dołhemu putniskemu ćahej so stajnje zaso dalši ludźo­ přizamkuja. W Altöttingu liča z něhdźe 9 000 putnikami. Jeničce zaćah do tamnišeje­ katedrale traje cyłu hodźinu. Foto: dpa/Armin Weigel