Po tym zo su tydźenja na mnohich wsach meju stajeli, jutře a njedźelu hižo prěnje meje zaso mjetaja. Kelko dźěła je z tym zwjazane, wě drje najlěpje tón, kiž je tajki swjedźeń raz sobu přihotował, a ćim bóle, hdyž je to časćišo činił. Štóž pak zamóže mejemjetanje 30. raz pospochi organizować, před tym směš z dobrym swědomjom kłobuk zejmować. Ja znajmjeńša Koslowčanow wobdźiwuju, zo su we wšitkich lětach sebi samym swěrni wostali a w swojej małej wsy rjany nałožk žiwy zdźerželi. Zo su jenož jónu w serbskej drasće­ wokoło meje rejwali, je škoda, ale nic dale zlě. Wažniše mi so zda je, zo haja dobru wjesnu zhromadnosć, zo móžeš ze susodom­ přez płót abo na puću serbsce bjesadować a zo dźěći nazhonjeja, kajke rjane nałožki w Serbach mamy. Potom budźemy tež přichodne lěta w Koslowje a druhdźe „Zelena ta meja“ spěwać móc. Marian Wjeńka

Katja Kipping, předsydka Lěwicy a zdobom zapósłanča strony w Němskim zwjazkowym sejmje­ (nalěwo), bě minjenu wutoru w Budyskim Kamjentnym domje. Něhdźe połsta wopytowarjam je wona tam swoju nowu knihu „Štó hižo dobrowólnje ćěka?“ předstajiła. W diskusiji w zwisku z debatu wo politice ćěkancam napřećo so wona za to zasa­dźowaše, přičiny ćěkanja kaž wójny a chudobu wotstronić, zo njebychu ludźo­ swoju domiznu wopušćić trjebali. Foto: Carmen Schumann

Ze swojimi rolatorami su wobydlerjo starownje w awstriskim Mehrnbachu meju wróćo přiwjezli, kotruž běchu jim pokradnyli. Widejo z wobrazami njewšědneje akcije su sej ludźo w interneće mjeztym 34 000 króć wobhladali. Ratar senioram mejski štom hižo wjele lět darmotnje­ přewostaja. Runje tak je tam z nješwarnej tradiciju, zo mužojo z bliskeje korčmy štom kradnu, tak tež minjenu njedźelu. Tónkróć pak so šěsć wobydlerjow­ z rolatorami zhromadnje z hladarjemi na puć nastajichu a sej swoju­ meju wróćo přiwjezechu.

Kuna je wčera železnisku čaru mjez Berlinom­ a Drježdźanami zlemiła. Pola Wikowa (Elsterwerda) bě wona na milinowy sćežor zalězła a krótkospjeće zawiniła. Při tym kuna zahiny. Milinowód so roztorha a so w nimojěducym ćahu zapopadny. Čara bě wjacore hodźiny zaraćena.

Berlin (dpa/SN). Tež studentki a šulerki maja přichodnje prawo na maćerski škit. To je dźěl wobšěrneje reformy maćerskeho škita, z kotrymž chce swójbna ministerka Manuela Schwesig (SPD) dotalny, nimale 65 lět stary zakoń ponowić. Naćisk zakonja su dźensa po měsacy trajacej koaliciskej zwadźe schwalili. Ministerka za kubłanje Johanna Wanka (SPD) bě so dołho spjećowała, škit maćerje na šulerki a studentki rozšěrić. Jako kompromis dojednachu so na wuwzaća, na přikład při wažnych pruwowanjach.

Cannabis na recept

Berlin (dpa/SN). Ćežko chori pacienća dóstanu cannabis přichodnje w apotekach na recept. Za to ma so konop w Němskej pod kontrolu plahować. Zwjazkowe knježerstwo je dźensa naćiskej zakonja strowotniskeho ministra Hermanna Gröhe (CDU) přihłosowało. Kóšty za cannabis maja chorobne kasy přewzać. Ćežkochori smědźa sej sušene kćenja konopje abo ekstrakty w apotece wotewzać, hdyž jim lěkarjo hinak pomhać njemóža.

Rockerojo witani byli