Surowa situacija
Twarske wiki derje předawali
Köln (dpa/SN). Miłe wjedro w měrcu a aprylu je tójšto ludźi w Němskej pohnuło, so do swójskeje zahrody podać. Twarske a zahrodowe wiki su lětsa wo tójšto lěpje do za jich tak wažneje nalětnjeje sezony startowali hač 2023. Branša je wo 4,4 procenty přidobyła a wobrot 4,76 miliardow eurow docpěła. Tole zdźěla zwjazk wikowarjow gratu, twarskich maćiznow a zahrodkoweje potrjeby. W měrcu su předawarnje samo přirost 9,6 procentow nadźěłali.
Wosebje prašane běchu zemja, symjenja a zahrodkowa chemija. Tu běchu wobroty wo 43 procentow wyše hač lěto do toho. Sylny rozrost registrowachu tež pola rostlinow a zahrodoweje techniki. Prašane běchu tež robotery-trawusyčaki.
Hłowny jednaćel zwjazka Peter Wüst je hladajo na wuhlady při wšěm zdźeržliwy. „Wjeselimy so, zo smy lětsa tak dobry zazběh dožiwili. Najebać to pak njeje wšudźe derje běžało.“ Jasne straty wobrota mějachu we wobłuku twarstwa kaž pola kachlicow (-15,2 procentaj), meblow (-9,7) a twarskich elementow (-8,2). Trěbne su „impulsy rozmacha“ ze stron politiki, je Wüst přeswědčeny.
To a tamne (10.05.24)
Dźěćo je w awće wohnjostroj zapaliło, čehoždla dóńdźe k wohenjej na zwjazkowej awtodróze A8 pola Stuttgarta, policija wčera zdźěli. Na zadnim sedle awta ležachu pryskotawki a bengalosy za narodniny. Kak a što dokładnje bě hólc zawčerawšim zapalił, njemóžachu přepytowarjo hišće zwěsćić. Jako wuchowanske pomocnicy k wohenjej přichadźachu, steješe awto na pódlanskej jězdnej a so hižo paleše. Mać a šěsćlětneho hólčeca dowjezechu pomocnicy do chorownje.
29. mjezynarodne zetkanje Trabantow je Trabbi Buggy klub zawčerawšim na lětanišću w Anklamje zahajiło. Něhdźe 700 wobdźělnikow zarjadowar tam wočakowaše. Za fanow NDRskich kultowych awtow a dalšich nostalgiskich jězdźidłow su hišće hač do zajutřišeje njedźele najwšelakoriše programowe dypki a wubědźowanja předwidźane.
CDU wólbny bój zahajiła
Berlin (dpa/SN). CDU je dźensa oficialnje horcu fazu europskeho wólbneho boja zahajiła. Na zjězdźe strony w Berlinje su kónčnu fazu boja do wólbow 9. junija startowali. Planowana bě tež narěč prezidentki komisije EU Ursule von der Leyen před tysac delegatami. Unija CDU/CSU ma dobre wuhlady, so při wólbach z najsylnišej politiskej mocu stać. Wona docpěwa tuchwilnje stabilnje 30 procentow, dwójce telko kaž SPD, Zeleni a AfD.
Ruska Ukrainu nadběhowała
Kijew (dpa/SN). Ruska je po informacijach Kijewa energijowy system Ukrainy znowa masiwnje nadběhowała. Minjenu nóc su připrawy milinoweho zastaranja w šěsć regionach atakowali. Technikarjo z wotmachom na tym dźěłaja, škody zwuporjedźić. Wobydlerjo su namołwjeni, milinu lutować. Nócny powětrowy alarm su zahajili, po tym zo so 21 ruskich bojowych trutow bližeše. Ukrainske wójsko je wjacore truty wottřěliło.
Žadyn proces přećiwo Trumpej
Na dworje Lipšćanskeje uniwersity steja sej pro-israelscy a ...
Ruske chorhoje lětsa znowa zakazane
Berlin (dpa/SN). Składnostnje skónčenja Druheje swětoweje wójny a wuswobodźenja wot nacionalsocializma před 79 lětami planuja dźensa a jutře tójšto zarjadowanjow a wopominanskich swjatočnosćow. Wopominać chcychu wuswobodźenje dźensa na sowjetskim wopomnišću w Berlinskim Treptowskim parku, w Tiergartenje w zapadnym Berlinje a ze zarjadowanjemi při Braniborskich wrotach. Tež w druhich městach Němskeje su zarjadowanja přizjewjene. Připowědźili su pak dźensa tež demonstracije w zwisku z wójnu Ruskeje přećiwo Ukrainje, mjez nimi pro-ruske a pro-ukrainske. Loni běchu móžnych namócnosćow dla 1 500 policistow zasadźili.
8. meje 1945 bě Němska kapitulowała. Druha swětowa wójna w Europje so skónči. W Ruskej woswjeća róčnicu jako swjedźeń dobyća 9. meje. Zastupnicy ruskeho wulkopósłanstwa tón dźeń na wjacorych wopomnišćach wěncy kładu.
Politiske nadpady raznišo chłostać
Podstupim (dpa/SN). Za lěpši škit politikarjow a čestnohamtskich pomocnikow we wólbnym boju zasadźuja so nutřkowni ministrojo Zwjazka a zwjazkowych krajow za to, chłostanske prawo přiwótřić. Zwjazkowa nutřkowna ministerka Nancy Faeser (SPD) žadaše sej na widejowej konferency kónc namocy a šćuwańcy. Posedźenje běchu po nadpadźe na politikarja SPD Matthiasa Eckeho w Drježdźanach zwołali. Wčera je skućićel w Berlinje hospodarsku senatorku Franzisku Giffey zranił. Politikarku SPD dyrbjachu na to w chorowni lěkować.
Předsyda konferency nutřkownych ministrow, braniborski nutřkowny minister Michael Stübgen (CDU), ma nadpady za wuraz wuwića, w kotrymž chcedźa ludźo swoje politiske zaměry z namocu, hidu a šćuwańcu přesadźić.
Ministrojo podpěruja iniciatiwje Bayerskeje a Sakskeje. Krajne knježerstwo Sakskeje bě wčera wobzamknyło, so za přiwótřenje chłostanskeho prawa w padźe nadběhow na politikarjow a pomocnikow zasadźować. Bayerska chcyła čestnohamtsce dźěłacych lěpje hač dotal před namócnosćemi škitać.
Ze stawiznow wuknyć!
Tesla w srjedźišću protestow
Grünheide (dpa/SN). Sta aktiwistow wočakuja wot dźensnišeho na wjacore dny trajacy protest přećiwo rozšěrjenju twornje awtotwarca Tesla z USA w Grünheide južnje Berlina. „Ličimy z wulkim zasadźenjom“, zdźěli rěčnik policije. Wón wočakuje wjetše haćenja nadróžneho wobchada. Spočatnje njeliča z namócnymi rozestajenjemi z policiju. „Nastajimy so na měrniwy wotběh protestow.“
