Palma: Turisća, dźiće domoj!
Palma (dpa/SN). Tysacy ludźi su minjeny kónc tydźenja na kupje Mallorca přećiwo masowemu turizmej demonstrowali. Pod hesłom „My prajimy: kónc!“ zhromadźichu so ludźo sobotu wječor w centrumje stolicy kupy Palma. Policija rěčeše wo 10 000 demonstrantach. Ludźo přichadźachu ze wšěch kónčin kupy a wołachu mjez druhim „Turisća, dźiće domoj!“. Dalše hesło protestow bě: „Mallorcu njepředamy!“. Do demonstracije namołwjała bě organizacija „Banc de Temps de Sencelles“, kotraž ma spochi přiběracu ličbu wopytowarjow a dowolowych kwartěrow za hłownu přičinu pobrachowacych bydlenjow na kupje.
Demonstranća, mjez nimi swójby z dźěćimi, šulerjo, studenća a rentnarjo, ćehnjechu po wobchodowej dróze Passeig del Born. Protestnemu ćahej přizamknychu so dźěłarnistwa, skupiny škitarjow wobswěta a wšelake wobydlerske iniciatiwy. Zarjadowanje steješe po zaćišćom sypnjeneho hosćenca minjeny štwórtk ze štyrjomi smjertnymi woporami. Ludźo na kupje su přeswědčeni, zo njejsu domy w turistiskich štwórćach za masowy turizm scyła twarjene.
To a tamne (27.05.24)
Kóčka je w Nižozemskej po tukanju měšćanskeho zarjadnistwa radnicu gmejny Dokkum zapławiła a škodu 325 000 eurow načiniła. Twarscy dźěłaćerjo běchu kóčku w radnicy friziskeje gmejny wuhladali. Dokelž so jim njeporadźi, zwěrjo popadnyć, dom zamknychu. Na to bě kóčka prawdźepodobnje honač wotwjertnyła. Woda poněčim sćěny a meble přemoka a skónčnje hač do pincy kapaše. Dźěl sobudźěłaćerjow dyrbješe do druheho twarjenja přećahnyć.
Falšowane wólbne plakaty w Lipsku změja prawniske konsekwency. Tole je šef wokrjesneje CDU Andreas Nowak připowědźił. Njeznaći běchu změnjene plakaty CDU wupowěsnyli. Na nich žadaja sej – napodobnjejo hesła CDU – „Lipsk njewěsty sčinić“ abo „Na wjace kalifata so zwažić“. Tuchwilu pruwuja, hdźe su tajke plakaty wšudźe wupowěsnjene.
Mjeńšinowy artikl sej žadali
Berlin (SN/mb). Mjeńšinowa rada je na swojim wčerawšim wuradźowanju na njedawno nahle zemrětu Ilse Johannu Christiansen, wjelelětnu sewjerofrizisku zastupjerku w tutym třěšnym gremiju domoródnych narodnych mjeńšin Němskeje, spominała. Dźensa wobdźělitaj so předsyda a hłowna jednaćelka Domowiny, Dawid Statnik a Judit Šołćina, na pohrjebje Christiansen, kotraž běše hišće prezidentka sewjerneje rady Frizow.
Składnostnje 75 lět zakładneho zakonja je mjeńšinowa rada žadanje za mjeńšinowym artiklom wobkrućiła. Kónc tydźenja je mjeńšinowy sekretariat pod nowym wjednikom Mětom Nowakom tež na wulkim swjedźenju demokratije w Berlinje widźeć. Mjeńšinowy sekretariat pyta tuchwilu wědomostnu referentku a projektnu managerku za pućowansku wustajeńca.
Ze stron Serbow staj so na posedźenju mjeńšinoweje rady wicepředsyda Domowiny dr. Hartmut Leipner a Judit Šołćina wobdźěliłoj. Gremij je – podobnje kaž njedawno třěšny zwjazk Serbow – namołwu k wólbam schwalił, kiž je internetnje wozjewjena.
Israel z ofensiwu pokročuje
Gaza (dpa/SN). Israelska armeja ze swojej ofensiwu w měsća Rafah na juhu Gazaskeho pasma přećiwo islamistiskej Hamas pokročuje. Israelske wójsko je sej wěste, zo maja wojowarjo Hamas tam swoje poslednje zepěranišćo. Dotal su tam wjace hač 180 teroristow morili. Nimo toho su nastroje za startowanje raketow na Israel namakali a podzemske tunle zničili. Wjacore kraje běchu Israel prosyli, ofensiwu ciwilistow dla wotprajić.
Žada sej lěpši škit Ukrainy
Kijew (dpa/SN). Němska a Ukraina stej swojich mjezynarodnych partnerow prosyłoj, wjace za natwar skutkowneho powětroweho škita nad Ukrainu činić. „Wahanje a čakanje při podpěrje Ukrainy płaći žiwjenja dalšich njewinowatych ludźi a wohrožuje wěstotu druhich krajow“, rjekny wonkowny ministerka Annalena Baerbock (Zeleni). „Hdyž Rusku nětko njezadźeržimy, leća jeje rakety dale.“
Tola žanu pomoc sadarstwu
Při sypnjenju połnje wobsadźeneho hosćenca na kupje Mallorca stej ...
Demonstracija rozpušćena
Berlin (dpa/SN). Policija je demonstraciju na dobro Palestinjanow na Berlinskej Humboldtowej uniwersiće rozpušćiła. Wjacorych demonstrantow, kotřiž nochcychu campus dobrowólnje rozpušćić, z twarjenja wjedźechu. Zastojnicy nałožowachu při tym zdźěla ćělnu namóc. Někotři z demonstrantow skoržachu bolosćow dla. Sympatizanća studentow z hesłami „Free Palestine“ přećiwo policajskej akciji protestowachu.
Zwjazkowy justicny minister Marco Buschmann (FDP) je docentow na uniwersitach namołwjał, swojej zamołwitosći wotpowědować a ze studentami diskutować. Wuměna argumentow – runje na uniwersitach – dyrbjała mócniša być a wołanje a škrěčenje, wón rjekny.
Stajnje zaso dochadźa na uniwersitach Němskeje k protestam přećiwo postupowanju Israela w Gazaskim pasmje, pod kotrymž wosebje ciwilisća ćerpja.
Krah k wotstupej namołwjeny
Čěski inwestor w Essenje
Moskwa warnuje USA
„Započatk nabožneje wójny“
Wukaz Waršawskeho wyšeho měšćanosty zbudźa razne reakcije PiS
Waršawa. Wulku towaršnostnu diskusiju nastorčił je Rafał Trzaskowski, wyši měšćanosta pólskeje stolicy Waršawy, z wukazom, kajkiž tak razny nichtó wočakował njebě: Wotnětka su w zarjadnišćach města wšitke nabožne symbole zakazane: křiže na sćěnach runje tak kaž na blidach. Tež swjećatka abo postawy swjatych maja so zhubić. Oficialne zarjadowanja města wotměwaja so wotnětka bjez duchownych, hinak hač běchu to Polacy z časa knjejstwa narodno-konserwatiwneje strony PiS zwučeni.
Hłowna přičina wukaza je po słowach wyšeho měšćanosty nabožna neutralita. Přiwisnicy druhich nabožinow móhli wšudźe prezentne symbole katolskeje cyrkwje jako diskriminowace wobhladować. Sobudźěłaćerjo měšćanskich institucijow dyrbja po najnowšim tež akceptować, hdyž wopytowarjo na tym wobstawaja, zo nochcedźa hižo jako „knježe“ narěčani być, ale jako „knjeni“. Po internetnym naprašowanju 60 procentow Polakow rjadowanje wita, jeno 40 procentow so tomu spjećuje.
