Žadaja sej islamistow wotsunyć
Mannheim (dpa/SN). Po smjertnym nadpadźe z nožom w Mannheimje kopja so žadanja za konsekwentnym wotsunjenjom wukrajnych skućićelow. Wjacore zwjazkowe kraje podpěruja mjeztym Hamburgskeho nutřkowneho senatora Andyha Grotu (SPD), ćežko-kriminelnych wukrajnikow přichodnje tež do Afghanistana a Syriskeje wotsunyć. Sakski nutřkowny minister Armin Schuster (CDU) na to skedźbnja, zo sej Sakska hižo dołho wotsunjenja islamistow žada.
25lětny muž z Afghanistana bě minjeny pjatk na zarjadowanju islam kritizowaceje organizacija na Mannheimskim Hłownym torhošću z nožom šěsć muži zranił, mjez nimi policista. 29lětny zastojnik je pozdźišo na sćěhi swojich zranjenjow wudychał. Mjeztym maja jasne pokazki na islamistiski motiw skućićela. Tón bě 2014 w Němskej wo azyl prosył, štož pak tehdy wotpokazachu. Zwjazkowy kancler Olaf Scholz (SPD) chce so jutře w zwjazkowym sejmje we wobłuku knježerstwoweje deklaracije wěstotnemu połoženju w Němskej wěnować.
Połoženje wody dla kritiske
Katastrofowy staw w bayerskich wokrjesach – nowy zakoń připowědźeny
Regensburg (dpa/SN). Połoženje wulkeje wody dla je w dźělach Bayerskeje dale kritiske. W Regensburgu, hdźež běchu katastrofowy staw wukazali, dyrbješe wčera wječor 200 wobydlerjow swoje domy wopušćić. W hornjobayerskim wokrjesu Rosenheimje płaći tohorunja katastrofowy staw. Tež w gmejnach Raubling a Rohrdorf dyrbjachu ludźi ewakuować. Kelko ludźi bě potrjechenych, njebě spočatnje hišće jasne.
Wčera wječor běchu ludźi w Rosenheimskim wokrjesu namołwjeli, doma wostać. „Wobsteji strach za žiwjenje a strowotu“, rěka w zdźělence zamołwitych. Minjenu nóc je so połoženje trochu změrowało. Najebać to wostanu šule a pěstowarnje dźensa zawrjene. W sydom bayerskich wokrjesach dźensa wulkeje wody dla prezencna wučba wupadnje.
Ze spadowacej wulkej wodu su sćěhi zapławjenjow nětko hakle prawje widźomne. Tysacy pomocnikow při rumowanju pomhaja. Dotal su štyri smjertne wopory zličili.
Železniski wobchad je dale haćeny. Wjacore zwiski podłu Dunaja wupadnu, dokelž su kolije zapławjene.
Šansy wužiwać!
Žaruja wo třoch morjenych
Tirpersdorf (dpa/SN). Po namócnym njeskutku w swójbje z třomi mortwymi w Tirpersdorfje w sakskim Vogtlandźe su hišće wčera wječor w ewangelskej cyrkwi žarowanski nyšpor wotměli. „Tójšto ludźi je so přizjewiło, zo bychu so wobhonili, rjekny wosadny farar Philipp-Immanuel Albert. „Njeskutk je mnohich šokował.“ Nichtó njeby tole za móžne měł, njebě tež žanych pokazkow na to. Přichodnu sobotu planuja po słowach Alberta Božu słužbu za morjenych – a za skućićela.
28lětny muž bě so wčera rano telefonisce pola policije přizjewił a rjekł, zo je swoju swójbu morił. Policija namaka 85lětneho dźěda, 84lětnu wowku a 59lětnu mać muža mortwych. 28lětny da so hišće na městnje njeskutka zajeć. Pozadki njeběchu spočatnje jasne.
Dospołnje zludany je tež sportowe towarstwo wsy reagowało, wšako bě morjeny 85lětny bywši aktiwny a swěrny podpěraćel towarstwa. Muž bě towarstwo 1990 zhromadnje z druhimi aktiwnymi załožił, dwě koparskej mustwje natwarił a něšto lět nawjedował. Hač do naposledk je towarstwo stajnje zaso wopytał a po swojich mocach podpěrował.
Kołpje wróćo do hata přewodźeli
To a tamne (04.06.24)
„Na naše korjenje so dopominać a našu zhromadnosć skrućeć“
Pod hesłom „Ja wostanu w Knjezowym domje wěčnje“ (Ps 23,6) stej Skupina serbska namša a Spěchowanske towarstwo za serbsku rěč w cyrkwi njedźelu na 78. Serbski ewangelski cyrkwinski dźeń do Gołkojc přeprosyłoj.
Ekumeniske dojednanje
Fulda (B/SN). Mjez ewangelskej cyrkwju w Kurhessen-Waldecku a katolskim biskopstwom Fulda staj krajna biskopka Beate Hofmann a biskop Michael Gerber ekumeniske dojednanje podpisałoj. W dokumenće rěka, zo zawjazujetej so wobě stronje „k dalšim krokam po puću k widźomnej jednoće we wěrje a k zhromadnosći za Božim blidom.“
Baptisća w USA
Washington (B/SN). Južni baptisća, najwjetša protestantiska cyrkej w USA, je w času wot 2022 do 2023 něhdźe 241 000 čłonow zhubiła a ma jich nětko hišće 12,98 milionow. We wosadach pak su wot lěta 2023 ličby křćeńcow zaso wo 26 procentow stupali, tež wobdźělenje wěriwych na kemšach znowa přiběra.
Za islamsku identitu
Hamburg (B/SN). Wustawoškit starosći so wo nowu islamistisku syć, kotraž je sej njedawno w Hamburgu před 3500 wobdźělnikami demonstracije žadała: „Přichod słuša Allahej, islamej a koranej!“ Skupina předstaja so na Youtube jako „Zjednoćenstwo muslimow, kotrež chce islamisku identitu wobchować.“ Wustawoškit pak měni, zo spřećiwja so zjednoćenstwo swobodnodemokratiskim zasadam.
Město swjećby swjedźeń
Žada sej stejišćo Scholza
Berlin (dpa/SN). Předsydka strony BSW Sahra Wagenknecht žada sej wot zwjazkoweho kanclera Olafa Scholza (SPD) knježerstwowu deklaraciju k prašenju, čehodla je dotalny kurs wopušćił a Ukrainje nětko tola dowolił, němske brónje přećiwo wojerskim objektam w Ruskej zasadźić. Scholz bě minjene měsacy stajnje zaso před tym warnował, dokelž by tole wěstotu Němskeje wohrožowało. Wagenknecht kritizuje, zo je „měrowy kancler“ mjeztym riziko za Němsku.
USA: Israel zaměry docpěł
Washington (dpa/SN). USA wukonjeja dale ćišć na Israel a kraj namołwja, wójnu w Gazaskim pasmje spěšnje skónčić. „Z ryzy wojerskeho wida je tak, kaž je prezident Biden rjekł: Israelčenjo su najwjetši dźěl swojich wojerskich zaměrow w Gazaskim pasmje docpěli“, zdźěli direktor za komunikaciju Narodneje wěstotneje rady John Kirby nowinarjam. Hamas ma drje hišće wojerske kmanosće a Israel dale wohrožuje, tola jeje wojerska móc kaž loni 7. oktobra „je zlemjena“.
Prěnja prezidentka w Mexiku
