Klingbeil za předsydu woleny
Berlin (dpa/SN). Nowa frakcija SPD w zwjazkowym sejmje je dźensa Larsa Klinbeila za noweho předsydu wuzwoliła. Dotalny předsyda Rolf Mützenich bě njedźelu wječor po wólbnej poražce SPD wotstupił. Na to je stronski prezidij 47lětneho Klingbeila, kotryž pochadźa z Delnjeje Sakskeje, namjetował. Klingbeil ma zdobom wodźacu rólu w rozmołwach z CDU/CSU wo wutworjenju noweho zwjazkoweho knježerstwa přewzać.
Žane polěpšenje pola bamža
Rom (dpa/SN). Strowota bamža Franciskusa so tež po dwanaće dnjach w chorowni njepolěpši. Staw swjateho wótca je dale kritiski, byrnjež stabilny, Vatikan zdźěla. Wot kónca tydźenja njećerpješe 88lětny wjace na kuši dych. Tež jeho krej je w porjadku. Nawodu katolikow wot srjedź měsaca w chorowni Gemelli w Romje lěkuja. Franciskus ćerpi na ćežkim zahorjenju płucow. Mjeztym so wěriwi swěta wšědnje za njeho modla.
AfD chce wjace wliwa
Z wotmachom hotuja so w Kölnje na wulki přećah póstnicarjow ...
Rozmołwy unije a SPD wobćežne
Macron čłonam EU rozprawjał
Deal wo surowiznach pječa hotowy
Kijew (dpa/SN). Wjele diskutowany surowiznowy deal mjez Ukrainu a USA je po dny trajacych jednanjach pječa hotowy, tak informuja medije. Tole je prezident USA Donald Trump w Běłym domje wobkrućił. Nadrobnosće wón njemjenowaše. Zajutřišim, pjatk, móhł ukrainski prezident Wolodymyr Zelenskyj zrěčenje podpisać. Tón dźeń wočakuja jeho we Washingtonje. „Kaž słyšu, chce wón pjatk přijěć. To je za mnje okay, jeli wón to chce“, Trump rjekny.
Internetny portal Ukrainskaja Prawda w Kijewje wopisuje zrěčenje mjez USA a Ukrainu wo surowiznach jako zarunanje za wojersku pomoc Washingtona za wot Ruskeje nadpadnjeny kraj w minjenych třoch lětach. Nimo za wysoko-technologiske wudźěłki trěbne rědke surowizny kaž litium wujednachu tež, zo dóstanu USA přistup k ukrainskim žórłam zemskeho wolija a płuna.
W Ukrainje kaž tež w druhich krajach zbudźa zrěčenje wulke rozhorjenje, dokelž Trump nuzu Ukrainy za lukratiwny deal na dobro USA znjewužiwa.
Olympia ... da, da, da
W Radušu zaso camprowali
Muž dźěsći morił
To a tamne (26.02.25)
Pawk je w lětadle španiskeho lětarskeho předewzaća Iberia pilota kusnył. Muža dyrbjachu z medikamentom lěkować, tak španiske medije rozprawjeja. Pilot so spěšnje zaso zhraba a mašinu bjez problemow přizemi. Pawk so zminy. Tuž ani njewědźa, wo kotru družinu so jedna. Lětadło su hnydom wurjedźili. Fachowcy na to tukaja, zo je pawk na lětanišću w Casablance w Marokku do mašiny zalězł.
Dospołny wupad miliny je Chile zlemił. Něhdźe 98 procentow wšěch domjacnosćow bě wčera potrjechenych. Knježerstwo kraja we łaćonskej Americe je na to nuzowy staw wukazało. Potrjechena kónčina je dobrych 3 000 kilometrow dołha. Policija so na ćmowych dróhach wo to staraše, zo njeby nichtó chaos znjewužiwał. Mjeztym su milinu krok po kroku zaso připinyli. Pječa je wažny milinowód wupadnył, kotryž wšón kraj zastaruje.
Serbsku rěč na Youtube!
Mjezynarodna konferenca zaběra so ze starosćemi mjeńšinow
Paris (SN/MiR). Rěčna technologija za mjeńšinowe rěče je tema mjezynarodneje konferency, kotraž so wot wčerawšeho do jutřišeho w Parisu wotměwa. Z boka Serbow wobdźělitaj so na njej Ivan Kraljevski, sobudźěłaćer Fraunhoferoweho iinstituta w Choćebuzu a Daniel Zoba, społnomócnjeny Załožby za serbski lud za digitalizaciju. Hłowny wobsah wuradźowanjow je prezentacija aktualneho stawa digitalneje rěčneje technologije za mjeńšiny. Kraljevski a Zoba staj mjez něhdźe 300 akterami. Něhdźe połsta z nich předstaja jadriwje nałožowanu rěčnu technologiju z posterom. „Pytnjemy, zo njejsu rěčne technologije, kaž je wulke rěče wužiwaja, za mjeńšinowe rěče hišće dosć wuwite“, Zoba rozłoži. K tomu słušeja spóznawanje, přełožowanje a předčitanje rěče abo tež wužiwanje KI-modelow. Druhdy pak pobrachuja mjeńšinam móžnosće, sej to same nadźěłać. To ma wuskutki na dalše wuwiće a wužiwanje mjeńšinowych rěčow na wšelakich runinach, nic jeničce na ryzy technisku. Přičiny su wočiwidne.
