Nawrót k rozumnosći
Wčerawše wólby zwjazkoweho sejma běchu drje najwažniše wólby minjenych 20 lět w Němskej. Wolerjo su ze swojim hłosom jasnje zwuraznili, zo chcedźa hinašu politiku. Z kim so Friedrich Merz do noweho zwjazkoweho knježerstwa poda, njeje w tym zwisku ani tak wažne: Ludźo wočakuja jasne ćežišća noweho kanclera, w hospodarskej, energijowej, klimowej a měrowej politice.
Runje posledni dypk je ludźom jara wažny, kaž sylny wuslědk Lěwicy pokazuje. Merz móže dopokazać, zo je kmany, wójnsku politiku dotalneho knježerstwa změnić. Dołhodobnje w Europje bjez Ruskeje njepóńdźe. Dotal wšak ničo wotpowědneho wot Merza słyšał njejsym. Ludźo wočakuja w prěnim rjedźe nawrót k rozumnosći a kónc ideologisce barbjenych sonow. Zo měnja wolerjo to jara chutnje, pokazuje wuslědk AfD na wuchodźe. Hdyž Merz tole njespóznawa, móže sej AfD za štyri lěta pjenjezy za wólbne plakaty lutować. Marko Wjeńka
To a tamne (24.02.25)
Lutowarničce dweju dźěsći pokradnył je paduch w jednoswójbnym domje w Dummersdorfje njedaloko Rostocka. Njeznaty skućićel bě so minjenu srjedu zadobył, jako njebě nichtó doma. Zaměrnje paduch w prěnim poschodźe domu wšitke kamory přeborka. Tam pokradny naručny časnik 50lětneho nana a – wobě lutowanskej swinjeći dźěsći. Policija nadźija so špatneho swědomja paducha.
Na mokrej łuce ze swojim transporterom tčacy wostałoj staj paduchaj w schwabskim Memmingenje. Swědcy běchu policiji zdźělili, zo su paduši wjacore nastroje z twarskeho kontejnera pokradnyli. Zastojnicy wuhladachu na to muža a žonu w awće na błóćanej łuce njedaloko kontejnera. Kradnjene nastroje w hódnoće 10 000 eurow stejachu na kromje łuki. Padustwo móžachu zastojnicy woběmaj přirjadować, w rozprawje rěka.
Trudla Malinkowa sydomdźesatnica
Mnoho čitarjam SN je Trudla Malinkowa derje znata přez informatiwne nastawki, zajimawe knihi a putace přednoški, kotrež ćěmne blaki stawiznow wuswětluja. Pilnje a akribisce serbske kulturne a cyrkwinske stawizny přeslědźuje. Jeje dopóznaća potom rady a zahoriće šěrokemu publikumje posrědkuje. Tak naš wid na wuwiće Serbstwa wudospołnja a tež wobnowja. Dnja 21. februara woswjeći Trudla Malinkowa swoje 70. narodniny.
Wospjet kabl wobškodźeny?
Stockholm (dpa/SN). W Baltiskim morju bu prawdźepodobnje wospjet kabl wobškodźeny. Mjeztym su fachowcy přepytowanja zahajili, wobkrući šwedska pomórska straža. Kabl leži mjez Finskej a Němskej. Šwedski ministerski prezident Ulf Kristersson je mjeztym zdźělił, zo škody na infrastrukturje w Baltiskim morju chutnje bjeru, předewšěm hladajo na tuchwilne wěstotne połoženje.
Podźěl zwjazka za rentu niši
Berlin (dpa/SN). Podźěl zwjazka na financowanju renty je w minjenych 20 lětach woteběrał. Dawkipłaćerjo su w lěće 2004 hišće 24,2 procentaj toho sobu financowali. W lěće 2023 je so podźěl na 22,4 procenty znižił.
Wjace pjenjez w móšni
Berlin (dpa/SN). Přistajeni w Sakskej maja wjace pjenjez w móšni. Loni w štwórtym kwartalu je realna mzda wo přerěznje 1,4 procenty porno 2023 stupała, zdźěli krajny statistiski zarjad. Z tym je realna mzda sydom kwartalow za sobu stupała. Zwyšenje mzdow inflacije dla běše wuspěšne, statistikarjo w Kamjencu zwěsćichu.
Před Braniborskimi wrotami w Berlinje zwuraznjeja demonstranća swoju ...
Hamas wopačne ćěło přepodała
China mjelči
Weidel wabi za wobornu winowatosć
Berlin (dpa/SN). K zesylnjenju zwjazkoweje wobory wabi kanclerska kandidatka AfD Alice Weidel tele dny za dwulětnu wobornu winowatosć. Po jeje słowach njejsmy hižo kmani Němsku zakitować, rjekny wona w kónčnym kole wusyłanja k wólbnemu bojej sćelakow ARD a ZDF. Nimo toho słuži woborna winowatosć k tomu, zo so ludnosć ze swojim wójskom identifikuje.
Generalny sekretar CDU Carsten Linnemann a šef krajneje skupiny CSU Alexander Dobrindt staj so mjeztym za to wuprajiłoj, zawjazowace lěto za towaršnosć załožić, kotrež móža młodźi mužojo pola zwjazkoweje wobory, wohnjoweje wobory abo techniskeho pomocneho skutka wukonjeć.
Předsyda FDP Christian Lindner plany AfD kategorisce wotpokaza, dokelž to swobodu młodych ludźi haći. Tež załožerka strony BSW Sahra Wagenknecht je přećiwo tomu. „Trjebamy zwjazkowu woboru, kotraž móže nas zakitować, za to pak njetrjebamy wobornu winowatosć“, wona podšmórny.
Hišće su překwapjenki móžne
Reforma, temy, zwada – njedźelu su wólby 21. zwjazkoweho sejma
Berlin/Drježdźany (dpa/SN/MG). We wusyłanju „Kónčne koło“ sćelakow ARD a ZDF su politikarki a politikarjo stronow, kotrež su w zwjazkowym sejmje zastupjene, wčera wšelke ćežišća sadźili. Wonkowna ministerka Annalena Baerbock (Zeleni) zwurazni, zo „měli jako Europjenjo swój měr sylnišo škitać“, wosebje hdyž wěstotne garantije USA hižo njewobsteja. Generalny sekretar SPD Matthias Miersch rjekny, zo budźe reforma mjezy zadołženja centralne prašenje za financowanje wójska. Šef krajneje skupiny CSU Alexander Dobrindt tomu znapřećiwi žadajo sej, zo měło so wšo z pjenjezami etata zapłaćić. Generalny sekretar CDU Carsten Linnemann so za to wupraji, zo měła Němska w Europje nawjedowacu rólu přewzać a swoju kmanosć zakitowanja wutwarić.
impresum
Serbske Nowiny wudawaja so w Domowina-Verlag GmbH Ludowym nakładnistwje Domowina
Jednaćel: Syman Pětr Cyž
Ludowe nakładnistwo Domowina tzwr spěchuje Załožba za serbski lud, kotraž dóstawa lětne přiražki z dawkowych srědkow na zakładźe hospodarskich planow, wobzamknjenych wot Němskeho zwjazkoweho sejma, Krajneho sejma Braniborskeje a Sakskeho krajneho sejma.
Šefredaktor a zamołwity redaktor w zmysle
nowinarskeho zakonja: Marcel Brauman 577 232/233 Wyša redaktorka: Bianka Šeferowa 577 230
tel.: 03591 577 232 faks: 03591 577 202 e-mail: www.serbske-nowiny.de
Adresa redakcije a nakładnistwa: Sukelnska 27, 02625 Budyšin
Adresse der Redaktion und des Verlages: Tuchmacherstraße 27, 02625 Bautzen
Serwis za abonentow: 577 263
Předań nawěškow: Jadwiga Šołćic 577 266 e-mail:
Ćišć: DVH Weiss-Druck GmbH & Co. KG, Lejnjanska 14, 02979 Halštrowska Hola, wjesny dźěl Hory
Vertriebskennzeichen: 2 B 2560 B
