Šesty raz wita dźiwadłowy festiwal mjezynarodnych hosći do Łužicy

Budyšin (SN/MG). „Ahoi“, witaše intendant Němsko-Serbskeho ludoweho dźiwadła Lutz Hilmann zajimcow na wote­wrjenju mjeztym šesteho mjezynarodneho dźiwadłoweho festiwala „Witajće dru­hdźe“. Wuměłski team za festiwalom bě sej „Zhromadnje w jednym čołmje“ jako moto pjeć dny trajaceho spektakla wu­zwolił. Wuměłski nawod festiwala ma nawoda sociokulturelneho centruma dźiwa­dła Thespis Georg Genoux zhromadnje ze swojej partnerku Anastasiu Tarkhanovej.

Na wotewrjenju wažneho festiwala, kotryž spěchuje lětsa prěni raz kulturna załožba Zwjazka, so wězo tež najwšelakoriše postrowne słowa přednošowachu. Prěnju tajku narěč dźeržeše socialna ministerka Petra Köpping (SPD) we widejowej powěsći. Wona zwěsći, zo „pokaza Thespis-centrum, kak funguje integracija z pomocu dźiwadła“.