Archiw zhubjenych wsow dokumentuje wsy a sydlišća, kotrež su so bagram brunicy we Łužicy woprowali. Wot lěta 2006 běše zarjadnišćo w gmejnskim domje w Nowym Rogowje zaměstnjene. Nětko hotuje so na přećah do nastawaceho noweho industrijneho muzeja w Baršću a njeje tohodla wot 14. septembra na dotalnym městnje přistupny.

Baršć (SN/at). Braniborski tekstilny muzej w Baršću přetwarja na nowy industrijny muzej. Dźěła postupuja a Stefan Palm, nawoda swójskeho zawoda za kulturu, turizm a marketing města Baršća, z toho wuchadźa, zo móža nowy muzej klětu w oktobrje hižo dźělnje wotewrjeć. To je předewšěm na dobro towarstwow, rjekny wón. Nowu trajnu wustajeńcu chcedźa hač do oktobra 2026 wuhotować. „Wobstatk toho je Archiw zhubjenych wsow“, wuzběhny Stefan Palm.