Ćahańca wo zapřijeće našeho regiona do „jadroweje syće“ Němskeje

Hamor (SN/mb). Nowa doba trjeba nowe wobličo. Njedawna njejapka změna na čole koncerna LEAG bě wuraz přechoda wot wuhla do wobnowjomnych energijow: Thomas Kramer dyrbješe woteńć, a za noweho předsydu předsydstwa zwoła dohladowanska rada šefa twarskeho zawoda Adolfa Roescha. Hakle w lěću bě Kramer w interviewje z „managermagazin“ rozkładł, čehodla so LEAG pozdźišo hač konkurent RWE „zelenej milinje“ přiwobroći. Nětko ma Roesch zwoprawdźić, štož LEAG na swojej internetnej stronje proklamuje: „Wodźik město wuhlika – to je hesło za klimoneutralnu energiju, industriju a mobilitu přichoda.“