Radwor (SN/MkWj). Spěwarki a spěwarjo Radworskeho chóra Meja su wčera swoju kóždolětnu hłownu – a lětsa tež wólbnu – zhromadźiznu přewjedli. Činili su tole runje 130 lět po załoženju chóra přez ­Jurja Słodeńka a 35 lět po zapisanju jako towarstwo, předsyda chóra Daniel Henich rozłoži.

Wjeselo při zhromadnym spěwanju je a wostanje čłonam najwažniši pohon, so kóždy štwórtk w „Słodeńku“, w rumnosći něhdyšeje nalutowarnje, na probu zetkać. Tam su tež minjene lěto ze swojim dirigentom Pětrom Cyžom, kotryž chór mjeztym 18 lět hudźbnje nawjeduje, ­zakłady swojich hudźbnych wjerškow kładli. Tak tež loni zaso na lětnim koncerće tójšto wopytowarjow na farskej ­zahrodźe zwjeselichu, hdźež běchu sej Choćebuski chór Łužyca přeprosyli. Wustupili su nimo toho w Židźinom z tamnišim chórom a pobychu po dźesać lětach zaso pola přećelow čěskeho partnerskeho chóra w Bašce na južnej Morawje.