Hornjoserbska premjera inscenacije „Smjerć po štučkach“ rěčnje wužadała

Budyšin (SN/MG). Na čim je klacało? Tute prašenje zwosta wot sobotnišeje premjery Němsko-Serbskeho ludoweho dźiwadła. Ani połojca městnow na hłownej žurli domu njebě wobsadźena, jako ansambl serbskich dźiwadźelnikow a dźiwadźelnicow swoju najnowšu produkciju „Smjerć po štučkach“ předstaji. Kruch z pjera Alexandra Maruscha a Madlenki Šołćic bě loni na wjesnych jewišćach w Delnjej Łužicy wulki hit. Lětsa potajkim hornjoserbska wersija krucha, kotruž je Fabian Kaulfürst z němskeho originala do ludoweje hornjoserbšćiny přełožił. Nastała je inscenacija na zakładźe powědančka Marcusa Końcaŕa. Dramatizowanje předłohi bě Załožba za serbski lud spěchowała.