Wočakuja sta hrajerjow – Hornjołužiske nakładnistwa hotuja so na wiki

Budyšin (SN/bn). We wobłuku zhromadneje nowinarskeje konferency wčera w Němsko-Serbskim ludowym dźiwadle su hosćićel a na Lipšćanskich knižnych wikach kónc měrca prezentowace so hornjołužiske nakładnistwa wo swojich nalětnich planach informowali. Intendant NSLDź Lutz Hillmann wuzběhny 24. swětowy dźeń šulerskeho dźiwadła, kotryž wuhotuja 31. měrca na jědnaće jewišćach po cyłym Budyšinje. Dohromady něhdźe 500 hrajerkow a hrajerjow chce 30 inscenacijow předstajić, mjez kotrymiž je wosom serbskich produkcijow. Nimo toho připowědźi zazběh předpředanje zastupnych lisćikow za lětuše lěćne dźiwadło pod hołym njebjom, kotryž ma so 12. apryla wotměć. W tym zwisku Hillmann rozłoži, zo budu zastupne lisćiki dróše: „Dyrbjachmy plan dochodow přiwótřenym financielnym wobstejnosćam přiměrić. Při tym pak smy na to dźiwali, zo wotpowědujemy našemu narokej jako ludowe dźiwadło, kotrež kóždemu zajimcej přistup zmóžnja.“