Wuwiwaja scenarij na zakładźe idejow a nazhonjenjow wobydlerjow

Baršć (SN/bn). Po jako prěni łužiski hrajny film připowědźenej produkciji „Ein Feuerwerk für die Kleinstadt“, kotraž bu loni w Grodku zwoprawdźena a prapremjernje předstajena, hotuje so label Lusatia­ Film na přichodny projekt. Po přikładźe z „parlicki Łužycy“ ma nowy film w Baršću nastać, při čimž chce mustwo wokoło režisera Erika Šyški wobydlerjow města a wokoliny wot wšeho spočatka do produkcije zapřijimać. Zaměrej labela wotpowědujo ma wuslědk awtentiski wobraz Łužicy sposrědkować; hrube hesło projekta je „Změna strukturow“. Prěni krok je „zhromadna rozmołwa z Baršćankami a Baršćanami, zo bychmy inspiracije zběrali a ideje rozjimali“. Za to wuhotuja dźensa za tydźeń na městnje zahajace zetkanje we wili Digitalkultur ze slědowacym filmowym wječorom. Wot kónca měrca chcedźa scenarij we wobłuku štyrjoch dźěłarničkow wuwiwać. Přizjewjenje za nje je wotnětka hač do 27. měrca pod www.lusatia-film.de móžne.